Nga Boldnews.al
Aksidenti i paradites së kësaj të Hëne në Tiranë, ku u përfshi një autobus i kompanisë “Green Line” dhe të paktën dhjetë makina të tjera, me një bilanc të dhimbshëm prej një dyzinë personash të plagosur, është më masivi, por për fat të keq jo i vetmi incident në kryeqytet, në të cilin janë përfshirë mjetet e transportit urban.
Rreth një vit më parë, një tjetër autobus i kompanisë në pronësi të Nadir Çaushollit, përfundoi në lumin Lanë, së bashku me pasagjerët në bord.
Ndërkohë, në vitet e fundit, ka pasur edhe aksidente të tjerë, disa me pasoja tragjike e disa për arsye të çuditshme.
Në vijim, “Boldnews.al” ka renditur disa prej aksidenteve të autobusëve urbanë të ndodhur në 5 vitet e fundit në Tiranë.
– Në 16 Tetor 2017, një autobus i linjës së Kombinatit, përplasi një burrë të moshuar pranë mbikalimit të “Pallatit me Shigjeta”. Personi u plagos rëndë dhe u dërgua menjëherë në spital.
– Në 8 dhjetor 2017, një e moshuar humbi jetën, pasi u përplas në mëngjes herët nga një autobus i linjës së Kamzës. Aksidenti ndodhi pranë “Urës së Institutit”.
– Në 18 nëntor 2019, në rrugën e “Durrësit”, autobusi urban me drejtues Ll.N. përplasi këmbësorin H.Zh, rreth 77 vjeç. Si pasojë e aksidentit, personi i dëmtuar është dërguar me urgjencë në spital.
– Në 20 prill 2021, një autobus i linjës së Kopshtit Zoologjik, ndërsa ishte me shpejtësi dyshohet se, duke parakaluar një autobus tjetër, është përplasur pranë Bashkisë së Tiranës.
– Në 22 prill 2022, një autobus i linjës së Unazës në Tiranë është përplasur me një makinë, për pasojë kanë rënë në lumin e Lanës. Bashkë me autobusin në Lanë ka rënë edhe një makinë.
– Në 2 maj 2022, Policia informoi se në bulevardin “Zogu I”, shtetasi D. Sh., duke drejtuar autobusin e linjës së Tiranës së Re, dyshohet se është përplasur me mbulesën e vendqëndrimit të stacionit të autobusit”
– Në 29 shtator 2022, një autobus urban ka përplasur një person që po udhëtonte me biçikletë në “Rrugën e Dibrës”. Pamjet e publikuara nga media në atë kohë tregonin për personin e shtrirë në tokë pas aksidentit.
– Në 14 nëntor 2022, një autobus i kompanisë “Go Green” që bën linjën e Unazës, është përplasur me një makinë tip ‘Mercedes Benz’ me targa AB 072DI. Aksidenti ka sjellë bllokimin e qarkullimit të automjeteve dhe panik tek qytetarët, që kanë dalë menjëherë jashtë,
– Në 26 nëntor 2022, në zonën e Kombinatit, një automjet është përplasur me autobusin urban.
