“Nuk e kuptoj si prokuroria mund të marrë parasysh kallëzimin e Monika Kryemadhit, dhe të mjaftohet duke arrestuar qytetarë të pafajshëm. I kam shërbyer vendit me besnikëri dhe në mënyrë ligjore. Mirë që unë u dogja dhe do dënohem por gjykata duhet të tregojë dinjitet dhe mos të arrestoje qytetarë të pafajshëm”.
Kjo ishte akuza e ish-ministrit të Mjedisit, Lefter Koka, teksa fliste para trupës gjykuese të dosjes së incineratorit të Fierit me 15 shkurt të këtij viti.
Monika Kryemadhi e ftuar në “Ora e Betit” tha se nuk është fare e surprizuar por i bëri thirrje të tregojë shokët.
“Nuk ka pse të më habisë. Lefteri të tregojë shokët, ata që e çuan në burg. Lefteri ka qenë i fundit i kavallit, është në burg, ndërsa Erion Veliaj vijon të marrë lekët te incineratori i Tiranës. Lefteri është në burg ndërkohë personat që e futën në këtë skemë bredhin nëpër botë. Problemi është shumë i madh. Lefteri me Alqin janë mercenarët.
Pres që për Tiranën të ketë një reagim. SPAK e ka shumë të vështirë të thërrasë Erion Veliajn në SPAK, presioni i tij është i jashtëzakonshëm. Më e pakta që pres është pezullimi i pagesave të incineratorit, paguajnë 100 mijë euro në ditë. Ta marrë në sekuestro”, tha Kryemadhi.
Arben Ahmetaj po përflitet se do jetë goditja e radhës e SPAK. Kryemadhi konfirmoi se është kallëzuar prej saj në SPAK por mohoi zërat se dosjen e incineratorëve e ka siguruar prej tij.
- Është kallëzuar nga ju?
Kryemadhi: Po. Janë kallëzuar të gjithë veprimet që kanë bërë ministrat. Arben Ahmetaj mund të akuzohet për rindërtimin dhe pse është treguar i zgjuar duke u kaluar tenderat te bashkitë. Koka e di si është i përfshirë Ahmetaj. Si mund të më jepte dosjen Ahmetaj mua kur ka qenë ideator i incineratorëve me Damian Gjiknurin dhe Mirel Mërtirin. Bënë incineratorin e Fierit dhe Elbasanit me fatura fiktive, ndanë paratë me njëri-tjetrit. Por janë Lefteri me Alqin që çojnë në burg Ahmetaj, firmë Beni nuk ka aty.
