Një tjetër rast i trafikut të drogës përgjatë kufirit të gjelbër mes Shqipërisë dhe Greqisë është goditur mëngjesin e kësaj të marte nga autoritetet helene.
Mediat greke bëjnë me dije se në Kostur janë sekuestruar 53 kg marijuanë, në një operacion të zhvilluar në një zonë pyjore.
Gjatë operacionit është arrestuar një shqiptar 23 vjeç, teksa ishte futur në tokë greke duke mbajtur në krahë 2 çanta që përmbanin 50 pako me 53 kg marijuanë.
Po kështu u sekuestruan dhe 2 celularë me 2 karta SIM dhe lekë shqiptare.
Prej fillimit të këtij viti, në zona të ndryshme të Greqisë janë kapur nga policia greke rreth 710 kg marijuanë që dyshohet se vinin nga Shqipëria.
Prokuroria e Narkotikëve pranë Nëndrejtorit të Sigurisë Kastoria ka nisur hetimet paraprake për rastin, ndërsa i arrestuari me çështjen penale të ngritur në ngarkim të tij do të dërgohet në Prokurorinë Penale të Kastorisë.
