Policia e Tiranës ka njoftuar edhe zyrtarisht arrestimin e shoferit të autobusit të linjës së “Unazës” pasi dyshohet se është shkaktari i aksidentit masiv në zonën e “Shallvareve” paraditen e të hënës.
“A. Xh., 63 vjeç, banues në Tiranë, për veprën penale “Shkelja e rregullave të qarkullimit rrugor”, pasi ditën e djeshme, duke drejtuar autobusin, është përplasur me disa automjete dhe si pasojë janë dëmtuar 9 shtetas, të cilët ndodhen jashtë rrezikut për jetën”, njofton policia.
Autobusi i “gjelbër” i kompanisë së Nadir Çaushollit mori përpara 10 makina, me shoferin që dukej se ishte i pavetëdijshëm, duke humbur plotësisht kontrollin e mjetit të transportit publik dhe duke vendosur në rrezik jetën e udhëtarëve.
Një ditë pas aksidentit bëhet me dije se policia ka sekuestruar kartelat mjekësore të Agron Xhafës, për të verifikuar deklaratat e tij, pasi pak pas aksidentit u shpreh se vuan nga zemra dhe diabeti, çka mund t’i ketë shkaktuar edhe rënien e tensionit.
Gjithashtu qytetarët që ndodheshin në autobus u shprehën pas ngjarjes se në momentin e përplasjes shoferi kishte mbështetur kokën dhe duart mbi timon, dhe dukej të ishte jo koshient.
Në pyetje policia po merr edhe 40 pasagjerët që ndodheshin në autobus në momentin e përplasjes.
Sakaq, nuk përjashtohet dhe mundësia që shkak për aksidentin të jetë bërë një defekt teknik i autobusit të linjës së “Unazës”, me mjetin që pritet t’i bëhet një kontroll teknik i detajuar.
