Policia ekuadoriane ka sekuestruar rreth 8.8 ton kokainë që ishin fshehur në një kontenier me banane që kishte për destinacion final Belgjikën.
Sekuestrimi i super-ngarkesës u njoftua të dielën nga policia e qytetit portual të Guayaquil.
“Është një sekuestrim rekord për vitin 2023 i më shumë se tetë tonëve kokainë”, shkroi komandanti i policisë gjenerali Fausto Salinas në llogarinë e tij në Twitter.
“Ne parandaluam (shitjen ndërkombëtare të) 90 milionë dozave, me vlerë 330 milionë dollarë në Evropë,” vlerësoi ai, duke publikuar një video që tregonte policinë duke kontrolluar kontejnerin.
I vendosur midis Kolumbisë dhe Perusë – prodhuesit kryesorë të kokainës në botë – Ekuadori kapi një sasi rekord të drogës në vitin 2021 rreth 210 tonë të destinuara për në portet evropiane.
Në vitin 2022, konfiskimet tejkaluan 200 tonë – 61% e të cilave ishte fshehur mes bananeve të destinuara për eksport. Që nga fillimi i vitit 2023, konfiskimet kanë arritur në 31 ton.
RÉCORD 2023 EN LA INCAUTACIÓN DE MÁS DE 8 TONELADAS DE COCAÍNA
Mediante técnicas de perfilamiento e investigación en contenedores en el puerto de #GYE
Evitamos el comercio internacional de 90 millones de dosis, valoradas en 330 millones de dólares en Europa#MásFuertesQueNunca pic.twitter.com/4U2UGhurYC
— GraD. Fausto Salinas Samaniego (@CmdtPoliciaEc) February 26, 2023
Sakaq konfiskimi i ngarkesë prej 8.8 ton përkon me një vizitë të Ministres së Brendshme të Belgjikës Annelies Verlinden dhe Komisioneres Evropiane për Çështjet e Brendshme Ylva Johansson në Ekuador dhe Kolumbi.
Të dy zyrtaret duan të forcojnë bashkëpunimin me dy vendet e Amerikës së Jugut në luftën kundër trafikut të drogës.
Belgjika është kthyer në vendin ku janë sekuestruar sasitë më të mëdha të kokainës brenda Bashkimit Evropian në vitet e fundit, me portin e Antwerpenit pikën kryesore të hyrjes për drogën ilegale.
Vitin e kaluar, doganat belge kapën afërsisht 110 ton kokainë në portin e Antwerp-it, një rekord i ri, pasi ishte hera e parë që kalohej shifra prej 100 tonësh.
Drejtori i Qendrës Evropiane të Monitorimit për Drogën dhe Varësinë nga Drogat, Alexis Gosdeel, tha në fillim të këtij muaji se “fluksi në rritje i kokainës tani kërcënon të gjithë Bashkimin Evropian”.
“Jam thellësisht i shqetësuar se zgjerimi i tregut të kokainës në BE po sjell një rritje të dhunës dhe korrupsionit në institucionet publike dhe qeverisjen,” paralajmëroi ai.
