Pamjet e reja të publikuara disas orë pas aksidentit masiv me 9 të lënduar, të cilat tregojnë qartë se autobusi “i gjelbër” i kompanisë së Nadir Çaushollit merr përpara 11 automjete në Tiranë, sipas ekspertit të qarkullimit rrugor Mamir Hodo mund të hedhin dritë mbi shkaqet e vërteta të përplasjes.
Inxhinieri Hodo i cilsoi veprimet e drejtuesit të autobusit aspak normale, teksa komentoi pamjet e aksidentit të rëndë në emisionin “Open”.
“Është një aksident i veçantë në llojin e vetë dhe mund të kishte përfunduar me shumë viktima. Unë kam qenë sot te vendngjarja dhe kemi marrë pamjet me dron për të parë më mirë se çfarë ka ndodhur. Bëhet fjalë për përplasjen e 11 mjeteve së bashku me autobusin. Kur shikon që ka këmbësorë që rrezikojnë jetën pasi lëvizin në një zonë të rrezikshme. Hetimi duhet të zbardhë të vërtetën, pasi veprimet e drejtuesit të autobusit janë jo normale. Gjysma e mjetit ishte në korsinë e tij dhe gjysma në korsinë tjetër. Qëllimi i drejtuesit të mjetit duhet të ishte të shkonte te stacioni i autobusit, pra veprimi i tij ka qenë i pakontrolluar”, tha Hodo.
https://youtu.be/z12Le8iGuvM
Fakti që gjysma e autobusit ishte në korsinë e tij dhe gjysma në korsinë tjetër, sipas ekspertit tregon se mund të ketë 2 arsye për aksidentin, një në pikëpamjen teknike të mjetit (një defekt i mundshëm) ose një veprim psikofizik i shoferit 63-vjeçar Agron Xhafa.
“Mund të ketë 2 arsye, një në pikëpamjen teknike të mjetit ose një veprim psikofizik. Nuk përjashtohet se ka pasur defekte të mjetit. Logjika edhe sipas deklarimeve të drejtuesit të mjetit është që nuk ka qenë në rregull në pikëpamjen shëndetësore, ose ka qenë mirë dhe ka humbur kontrollin”, theksoi Hodo.
