Kryeministri i Kosovës, Albin Kurti pas takimit që zgjati 5 orë në Bruksel, ka treguar se nuk është nënshkruar dokumenti i planit evropian për marrëveshjen Kosovë-Serbi pasi për këtë mungonte vullneti nga presidenti serb Aleksandër Vuçic.
“Unë nuk e kam nënshkruar sepse pala tjetër nuk ishte e gatshme për nënshkrim. Unë kam shprehur gatishmërinë për ta nënshkruar dhe fundja nuk do të ishte teksti i parë që nënshkruhen një kryeministër i Kosovës dhe kreu i Serbisë”, deklaroi ai.
Kurti tha se është “dëm që nuk u nënshkrua ai dokument sot”, por shtoi se ai ishte i gatshëm të nënshkruante për planin franko-gjerman, pasi në parim palët u duk sikur kishin rënë dakord.
“Unë mendoj që është dëm që nuk u nënshkrua sonte, meqenëse u pajtuam. Konfirmimi i pranimit të këtij teksti të propozuar, do të duhej të rezultonte me nënshkrim, por ishte pala serbe që nuk e nënshkroi meqenëse u pajtua”, ka thënë ai.
Kurti po ashtu paralajmëroi se dokumenti i planit do të publikohet së shpejti dhe se pret zhvillime nga takimi i radhë më 18 mars.
“Plani i zbatimit do të jetë se si të përkthehet në terren në realitetet e dy shteteve dakordimi për propozimin evropian. Unë besoj që është koha të mos jap interpretime dominuese, pikërisht në momentin që ky tekst do të lexohet nga të gjithë, por është marrëveshje që plotësisht vendos barazinë mes palëve, e simetrisë dhe fqinjësisë së mirë, gjithmonë në mënyrë demokratike dhe të ardhme. Tekstin e dakorduar do të mund ta lexoni që të gjithë”, deklaroi Kurti.Kryeministri i Kosovës, Albin Kurti, dhe presidenti i Serbisë, Aleksandar Vuçiç, u takuan sot në Bruksel, me ndërmjetësimin e shefit të politikës së jashtme të Bashkimit Evropian, Josep Borrell, dhe të dërguarit të BE-së për dialogun Kosovë-Serbi, Mirosllav Lajçak.
Kurti dhe Vuçiç takuan edhe të dërguarin e SHBA-së për Ballkanin Perëndimor, Gabriel Escobar, përpara takimit të përbashkët.
