Moti në vend ka ndryshuar kurs në fundjavë dhe zona të caktuara janë përfshirë nga reshje shiu pas një kohe të gjatë thatësire, të karakterizuar nga temperaturat e ulëta.
Edhe pse në intensitet të ulët krahasuar me periudhën e dimrit, duket se kanë mjaftuar pak orë shi, që qytetit i Lezhës të përmbytet, me ujin që ka shpërthyer nga kanalizimet në disa lagje për t’i bërë rrugicat të pakalueshme.
Blloqet e banimit 11 janari dhe 11.2 tokë hektarë në lagjen Besëlidhja raportohet të jenë të përmbytura aktualisht.
Uji ka vërshuar në rrugë duke krijuar vështirësi në lëvizjen e këmbësoreve dhe automjeteve, ndërsa janë bllokuar dhe hyrjet e disa pallateve pasi niveli i ujit ka arritur deri në 30 cm.
Në terren ka qenë e nevojshme ndërhyrja urgjente e punonjësve të shërbimeve publike të Bashkisë Lezhë, të cilët po bëjnë largimin e inerteve nga pusetat me qëllim evadimin e shpejtë të ujërave.
Situata të tilla si e sotmja në Lezhë janë bërë të vazhdueshme. Mjaftojnë shumë pak milimetra shi që qyteti të përmbytet pasi kanalizimet nëntokësore nuk e përballojnë nivelin e prurjeve.
