Sali Berisha u ndal te kemenaxhimi i Kaskadëës së Drinit, teksa foli para strukturave drejtuese të degëve 1, 3 dhe 4 në Tiranë, që u zhvillua mbrëmjen e sotme në selinë blu.
Teksa bëri thirrje për mobilizim masiv në protestën e 3 marsit, Berisha tha se një nga arsyet për të dalë në shesh është vjedhja masive që u bë me energjinë në tre HEC-et kryesore.
Skema sipas kreut të PD ishte e tillë që digat e hidrocentraleve në vend zbrazeshin duke shitur energjinë me çmimin më të ulët në treg. Berisha u fut në detaje duke zbuluar se energjia e prodhuar u shitej qeveritarëve që e blinin lirë dhe e shisnin 2-3 herë me shtrenjtë dhe më pas ndanin paratë me “Belindën, Ramën e hajdutë të tjerë”.
“Sot çmimet caktohen. Do vish me këtë çmim më të shtrenjtë se kosto dhe do ndajmë paratë. KLSH, çfarë gjeti? Digat gjigante. Të tre digat Koman, Fier, Vau i Dejës ishin zbrazur duke shitur me çmimin më të ulët. E gjithë energjia u shitej matrapazëve qeveritarë të cilët e blinin llirë dhe e shisnin dy-tre herë më shtrenjtë dhe ndanin paratë me Belindën, me Damianin, me Edi Ramën, me hajdutë si këta.
Asnjë kW/h nuk ka pasur evojë të blejë Shqipëria këto vite. Strategjia jonë e HEC-eve dha rezultate të shkëlqyera. Këta shit lir dhe rishit për veten e tyre. Këta nuk kanë asgjë me ju”, tha Berisha.
Por akuzat drejtuar ministres së Energjisë dhe Infrastrukturës, e njëherësh kryeministrit nuk u ndalën këtu, pasi Berisha u shpreh skeptik për anijet që janë kontraktuar për të prodhuar energji në brigjet e Vlorës.
Sipas liderit të opozitës qytetarët paguajnë 90 mijë euro çdo ditë si qira për ‘fantazmat’ në Gjirin e Vlorës, të cilët janë kontraktuar pa tender dhe pa garë të hapur.
“I dini ato fantazmat në Gjirin e Vlorës. I kontrakton dhe i firmos pa tender Edi Rama dhe Belinda Balluku. Sa paguhet thoni ju? 90 mijë euro çdo ditë qiraja. Në dy vite llogariteni vetë sa do paguajmë. Kjo zonja që nuk linte ditë pa gënjyer tani nuk del të thotë një fjalë. Sepse është e implikuar vetë. Këto 4-5 vite kanë qenë të turpshme, kur zyrtarë të nivelit të lartë u bënë gjeneratorë të korrupsionit madhor në Shqipëri. Çfarë e shtyn të mbulojë aferat e Belinda Ballukut tek ato anijet fantazmë që na gjobisin çdo ditën 90 mijë euro”, nënvizoi Berisha.
