Një organizatë shqiptare që vepronte në zonën e Mataró (Barcelona), duke kultivuar marijuanë në sasi të mëdha në shtëpi dhe magazina industrial, është shkatërruar nga skuadra “Mossos” dhe Policia Kombëtare spanjolle.
Në këtë operacion janë arrestuar 11 persona, të cilët sipas ElCaso.com janë të gjithë nga Shqipëria.
Të arrestuarit akuzohen për pjesëmarrje në grup kriminal, krime kundër shëndetit public (në aspektin e trafikut të drogës), vjedhje të energjisë elektrike dhe posedimi i armëve dhe lëndëve plasëse.
Grupi kishte një model shumë të mirëpërcaktuar për kultivimin e kanabisit. Fillimisht ata merrnin me qira shtëpi luksoze në zona të izoluara me dokumentacion fals dhe më pas sillnin të rinj nga Shqipëria për të rritur kanabisin.
‘Kopshtarët’ e sjellë nga Shqipëria dhe droga me bazë në Mataró
Grupi mbante një regjim të rreptë hierarkik, ashtu si edhe punëtorët pa precedentë penalë, të cilët vinin me vizë turistike për të kaluar 90 ditë, aq sa është koha e nevojshme për të punuar në plantacion dhe më pas për t’u kthyer me pagesën në vendlindje.
Sipas mediave spanjolle “kopshtarët” në të vërtetë u lanë të flinin në dyshekë në tokë dhe të rrethuar nga plehrat.
Ishin edhe dy anëtarë të tjerë që ishin përgjegjës për ruajtjen e kopshtarëve të rekrutuar në Shqipëri. Ata i furnizonin me materialin e nevojshëm për plantacionet, si dhe me të gjitha produktet dhe ushqimet e nevojshme që të mos kishin nevojë të largoheshin nga shtëpitë luksoze dhe magazinat industriale ku punonin.
Në lidhje me bosët, dy prej tyre nuk kanë precedentë penalë, ndërsa tjetrit i është sekuestruar arma e zjarrit gjatë kontrollit dhe ka qenë nën hetim për akuzën e vrasjes me dashje.
Pjesa më e madhe e materialeve për të filluar dhe për t’i mbajtur plantacionet produktive u ble nga një dyqan kultivimi në Mataró. Ky dyqan i specializuar ofron një shumëllojshmëri të gjerë opsionesh në mënyrë që procesi i rritjes së marijuanës të jetë efikas, përcjellës dhe i lehtë për t’u kryer. Nga sa duket, të ardhurat vinin pothuajse ekskluzivisht nga trafiku i drogës, i cili kishte si destinacion përfundimtar vendet e Europës Qendrore, ku çmimi i shitjes për konsumatorët mund të dyfishohej ose trefishohej.
Rreth 4000 bimë kanabisi, armë dhe hanxhar
Mossos d’Esquadra dhe Policia Kombëtare e çmontuan së bashku këtë rrjet me bazë në Mataró, por që u shpërnda në të gjithë zonën e Barcelonës, më 24 janar.
Agjentët kryen kontrolle në qytetet Mataró, Cabrils, Sant Adrià del Besòs, Sant Antoni de Vilamajor, Sant Antoni de Llavaneres, Riells i Viabrea dhe Vallirana; ku sekuestruan më shumë se 97 kilogramë sytha marihuane, afro 4000 bimë në proces rritjeje, 223435 euro para cash dhe ndër të tjera sekuestruan një armë zjarri dhe një hanxhar.
Ata gjetën gjithashtu dokumentacion fals dhe një dokument identiteti nga një person i tretë pa lidhje me hetimin, si dhe një numër të madh celularësh.
Agjentët gjatë kontrolleve kanë arrestuar gjithsej njëmbëdhjetë persona. Tre prej tyre ishin pjesë e drejtimit të grupit kriminal dhe pjesa tjetër ishin kopshtarë dhe kujdestarë të plantacioneve
Kopshtarët, pasi dëshmuan në komisariatin e policisë, u lanë të lirë në pritje të paraqitjes para organit gjyqësor. Të tjerët, më 26 janar, iu dorëzuan gjykatës hetuese numër 2 të Matarós dhe magjistrati përkatës urdhëroi lirimin e tyre me akuza dhe masa paraprake. Hetimi mbetet i hapur.
