Një ndjekje policore është zhvilluar orët e vona të së Premtes në Durrës, ku drejtuesi i një automjeti tip “Ford” ka sfiduar uniformat blu, duke mos iu bindur urdhrit të tyre për të ndaluar.
Shoferi arriti të arratisej, ndërsa efektivët arrestuar pasagjerin në mjet, një 19 vjeçar, si dhe sekuestruan një pistoletë.
Aksioni
“Shërbimet operacionale të Drejtorisë Vendore të Policisë Durrës, në bashkëpunim me shërbimet e Stacionit të Policisë Manzë, pas sigurimit të informacionit në rrugë operative se në orët e vona të mbrëmjes së djeshme, dy shtetas që qarkullon me automjet nga Manza në drejtim të Durrësit, kishin armë zjarri me vete, kanë organizuar e koduar ‘Late hours’.
Shërbimet e Policisë kanë lokalizuar automjetin e dyshuar tip ‘Ford’ dhe i kanë dhënë shenjë për ndalim, por drejtuesi i automjetit, sapo ka parë shërbimet e Policisë, nuk i është bindur urdhrit për të ndaluar, por ka shtuar shpejtësinë, duke rrezikuar jetën e punonjësve të Policisë. Shërbimet e Policisë janë vënë në ndjekje të automjetit dhe kanë bërë të mundur kapjen dhe arrestimin në flagrancë të shtetasit Orgito Vathaj, 19 vjeç (pasagjer). Gjithashtu, kanë shpallur në kërkim shtetasin Azem Allçi, 32 vjeç, banues në Manzë, i cili mundi të largohej duke përfituar nga errësira”, njoftoi policia.
Gjatë kontrolit në automjet, efektivët gjetën dhe sekuestruan në cilësinë e provës materiale një armë zjarri pistoletë dhe municion luftarak, shtuan të njëjtat burime.
Vijon puna për kapjen e drejtuesit të automjetit, ndërsa materialet i kaluan Prokurorisë pranë Gjykatës së Shkallës së Parë Durrës, për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Mosbindja ndaj urdhrit të punonjësit të policisë” dhe “Moskallëzimi i krimit”, mbyllet njoftimi i bluve.
