Shkolla – institucioni që shoqëria pret të jetë model në edukimin dhe formimin e nxënësve, duket se është shumë larg të qenit e tillë.
Këtë e dëshmojmë dhe disa pamje të publikuara së fundmi në rrjetet sociale.
Në një video që është kthyer në virale, shfaqen disa nxënëse që përleshen fizikisht me njëra-tjetrën. Fjalori banal me të cilin protagonistet, vajza të mitura shajnë njëra-tjetrën është i larmishëm. Rreth tyre, djem e vajza të tjerë, bashkëmoshatarë të adoleshenteve që përleshen duke shkulur flokët e njëra-tjetrës, duke u qëlluar me grushte e shqelma, formojnë grupin e tifozëve. Të tjerë duken të përqendruar teka filmojnë me celular luftimin.
View this post on Instagram
Ngjarja u raportua se ka ndodhur pranë ambienteve të shkollës 9-vjeçare “Kongresi i Manastirit” në Tiranë. Alesa Peleshi, blogeria e cila ka shpërndarë pamjet në rrjetet sociale, dënoi dhunën dhe bullizmin.
Në një reagim, “Kongresi i Manastirit” saktësoi se ngjarja “ka ndodhur në datën 15 shkurt 2023 në orën 14:00, rreth një kilometër larg shkollës”, ndërsa konfirmoi se nxënëset e përfshira janë pjesë e institucionit arsimor.
Pas publikimit të pamjeve u vu në lëvizje dhe policia, që njoftoi shoqërimin e 5 nxënësve.
Shkolla si vend krimi
Shkollat në vend janë kthyer shpesh dhe në vende krimi vitet e fundit.
Sherret mes nxënësve, nxënës që ofendojnë mësues, mësues që ofshajnë dhe dhunojnë nxënës, janë ndodhi të rëndomta që shfaqen herë pas here, duke ngritur shpesh pikëpyetje nëse shkolla e ka humbur misionin e saj. Zotimet e policisë ndërkohë, për shtimin e efektivëve në mënyrë rritjen e sigurisë në institucionet arsimore kanë rezultuar propagandë.
Megjithatë, ngjarje shumë më të rënda se këto kanë ndodhur brenda mureve të institucioneve që kanë marrë përsipër edukimin e brezave të rinj.
Kujtojmë se në një shkollë nisi historia traumatike e përdhunimit të një vajze në Kavajë disa vite më parë, ku protagonist ishte roja i instituionit. Ky i fundit, pjesë e personelit që duhet të kujdesej për fëmijët, u kthye në përdhunues.
Debat hapi edhe zbulimi disa muaj më parë se në një shkolle të Beratit, punonte si mësues një i dënuar për krime seksuale me të mitur.
Në Tepelenë, një mësues u dhunua fizikisht në Janar. Një prej autorëve, pas aktit, dëshmoi në polici se ishte kthyer nga jashtë vendit posaçërisht sepse e motra, nxënëse e mësuesit në fjalë, i kishte shprehur shqetësimin se ishte ngacmuar seksualisht. Mësuesi vu në pranga dhe u akuzua dhe për një tjetër rast ngacmimi seksual, ndaj një tjetër nxënëseje të mitur.
Me këto ndodhi të kobshme që shfaqen në shkollat shqiptare, ato tjetërsohen duke dështuar në misionin e tyre. Kthehen në një përbindësh të frikshëm për fëmijët, shëndeti mendor i të cilëve në këtë moshë cilësohet nga ekspertët e fushës shumë vulnerabël, duke lënë pasoja të pashlyeshme për pjesën tjetër të jetës.
