Një ëngjëll për Juventusin. Ishte pikërisht Angel Di Maria shpëtimtari i Juventusit sot në ndeshjen e kthimit në 1/16 e Europa League ndaj Nantes në Francë, me bardhezinjtë që fituan 0-3.
Të 3 golat u shënuan nga Di Maria, i cili ishte në një formë të jashtëzakonshme sonte. Goli i parë ishte një goditje spektakolare e argjentinasit, ndërsa i dyti erdhi nga pika e bardhë. Për të 3-tin e tij, u nevojit konfirmimi i VAR. Takimi i parë kishte përfunduar 1-1, me “Zonjën e Vjetër” që shkon tutje.
Në ndeshjet e tjera të Europa League, edhe Sporting Lisbona dhe Sevilja vazhduan më tej, ndërsa sfida mes Monako dhe Bajer Leverkusen shkuan në shtesë pas rezultatit 2-3 në kohën e rregullt, njëlloj si në sfidën e parë.
Në Conference League, Italianët e Lacios, arritën të siguronin një biletë për më tej, teksa barazuan në transfertë ndaj Kluzhit të Ermal Krasniqit. Triumfi 1-0 i lacialëve në ndeshjen e parë, bëri që skuadra e Sarrit të vijojë aventurën për më tej. Edhe në këtë duel titullar në radhët e Lacios u aktivizua mbrojtësi i Kombëtares, Elseid Hysaj, që bëri një paraqitje dinjitoze.
Supriza e këtyre dueleve ishte padyshim humbja 1-3 e Partizanit të Beogradit në shtëpi ndaj Sherif Tiraspol. Serbët fituan në ndeshjen e parë, me rezultatin minimal 0-1, teksa u mposhtën në të kthimit, duke sjellë eliminimin.
Në sfidën tjetër mes Dnipros dhe AEK Larnakës, ishin qipriotët që u kualifikuan për më tej. Dueli i sotëm mes këtyre dy skuadrave u mbyll në barazim pa gola, teksa në të parin fitoi AEK Larnaka me rezultatin 1-0.
Për sa i përket përballjes mes Anderleht dhe Ludogorets, ky takim iu drejtua minutave shtesë. Pasi në sfidën e parë fituan bullgarët me rezultatin 1-0, ndërkohë në sfidën e kthimit triumfuan belgët me rezultatin 2-1.
