Nga protesta e tretë e opozitës para Parlamentit, në të njëjtën kohë me seancën plenare, kreu i Partisë së Lirisë, Ilir Meta ka akuzuar kryeministrin Edi Rama si kryetarin e një bande të delegjitimuar, që me dhunë po vendos “kartonokracinë” në vend.
Duke iu referuar përjashtimit të 27 deputetëve të PD-së në muajin shkurt, Meta tha se Rama është në gjendje të rënduar dhe i tmerruar nga opozita që i nxjerr të vërtetat për firmat e hedhura në tendera dhe skandalin McGonigal.
“Ai është në një gjendje shumë të rëndë por edhe sepse e ka shuar edhe atë Parti Socialiste që ekzistonte. Shqipëria sot vuan nga kartonokracia. Mos u habisni nëse do u japë urdhra deputetëve të PD që edhe një i vetëm deputet i PD të mos ngelet. Se edhe një i vetëm e tmerron se e tmerron e vërteta. E tmerron firmat që ka hedhur për të vjedhur miliarda, për të blerë McGonigalët, për të vrarë pluralizmin në Shqipëri. Dëshiron ta kthejë Shqipërinë në një ferr të vërtetë për shqiptarët e ndershëm. Prandaj do të shkatërrojë pluralizmin. E kanë kuptuar dhe socialistët e ndershëm dhe idealistët. Nuk krahasohemi dot as më shtetin më të ri në rajon, Kosovën. Kemi të bëjmë me një bandë që është deligjitimuar plotësisht. Kur ngrihet populli ngrihet llogaridhënia, bien çmimet. Ju deputetë të PS-së mblidhuni të mos keni një fat si PASOK-u në Greqi”, tha Meta.
Kreu i PL gjithashtu tha nga podiumi i protestës se Rama ka frikë nga çdo zë kundër tij brenda PS, dhe zgjedh “t’i asgjësojë ata”, duke shtyrë ditët në krye të qeverisë duke “ua futur shokëve”.
Meta tregoi historinë e një socialisteje, e cila kur ai ishte President i tha se Rama i kishte premtuar ta çonte ambasadore në SHBA pasi ajo kishte kishte ngritur zërin kundër disa vendimeve dhe ligjeve në mbledhjet e Grupit Parlamentar të PS.
“Duhet t’u them një histori, sesi u katandis kështu ky parlament, që përjashtohen ata deputetë të nderuar për një fjalë gojë… Në 2017 më erdhi një ish-ministre socialiste, s’ka nevojë t’ia them emrin, sepse secili e imagjinon, edhe më thotë, ‘meqenëse se ti je zgjedhur për president, a ke t’i kundërshtim që unë të shkoj ambasadore në SHBA’, ‘jo i thash, por pse?”. ‘Më thirri Edi, mu përgjëruar dhe më tha të dua atje’. I thash ‘unë s’kam kundërshtim, por kujdes mos ta fut Edi, se s’të do më deputete’., sepse ajo ishte zëri i fundit kundër që kishte mbetur në PS… ajo zonja e nderuar, as ambasadore nuk bë, dhe as anëtare e asamblesë nuk u bë. Pse? Sepse është skizofren dhe edhe një zë kundër e shqetëson”, tha Meta.
Më tej, Meta kujtoi se Rama ka shitur dy nga ministrat e tij, Saimir Tahirin për kanabizimin e vendit dhe Lefter Kokën për inceneratorët, por theksoi se i radhës është “shoku” Arben Ahmetaj në të njëjtën aferë me ish-ministrin e Mjedisit.
“Ai është mësuar të shtyjë ditët duke ia futur shokëve, kështu ia futi Saimirit, kështu ia futi Lefterit, kështu i ka njoftuar të gjithë që do t’ia fusë edhe Arbenit. Edhe ju kolegë socialiste mblidhuni dhe jepjani dënimin”, deklaroi ai.
