Nesër në mesditë pritet që të afërmit dhe miqtë t’i japin lamtumirën e fundit 37-vjeçarit Pëllumb Islami, i cili mbeti i vrarë nga një plumb “qorr” në një shisha-bar në “Nea Joni” të Athinës.
Hidrauliku shqiptar që vdiq pas plumbit të marrë në shpatull gjatë kohës që shihte ndeshjen e futbollit, ndërsa 7 bashkatdhetarë të tij u përleshën dhe shkrepën armët, mësohet se do të prehet në vendlindjen e tij në Shqipëri.
Trupi i 37-vjeçarit nga Delvina u identifikua mëngjesin e djeshëm nga vëllai i tij, i cili nuk mund ta besonte se një plumb qorr i mori jetën. Ndërkohë për mediat greke ka folur kunata e 37-vjeçarit, e cila tregoi edhe minutat e fundit të të ndjerit.
“Ajo që zbuluam ishte se po nxitonte të dilte jashtë për të shpëtuar sapo dëgjoi të shtënat. Ai ndoshta e kuptoi se çfarë ndodhi dhe vrapoi të largohej por nuk ia doli. Më herët fliste me kamerieret dhe i pyeste se kush ishin sepse nuk i njihte. Kur e dëgjoi zënkën e tyre, bërtiti ‘qetësohuni djema, qetësohuni’”, ka rrëfyer ajo për mediat greke.
Më tej e ka përshkruar Pëllumbin si një njeri që nuk kishte asnjë ngatërresë me njerëz si ata të përfshirë në përleshjen që i mori jetën.
“Ai nuk njihte asnjë prej tyre. Nuk kishte lidhje me ta. As në lokal nuk shkonte. Nuk e di nëse ndonjëherë shkonte për të parë ndeshje si të martën. Ishte punëtor dhe i qetë”, shtoi ajo.
Me lot në sy kunata e 37-vjeçarit ka thënë për Newsit.gr: “Ishte një njeri i shenjtë, padyshim që ishte shumë i mirë për t’i ndodhur kjo gjë”.
“Ajo që ndodhi ishte e padrejtë, pasi nuk ka lënduar askënd. Ai shkoi të shihte një ndeshje, kishte shkuar në lokal me një shok“, shtoi ajo.
Më paska zbuluar se e morën vesh për ngjarjen në orën 7 të mëngjesit kur u zgjuan për t’i çuar fëmijët e tyre në shkollë.
37-vjeçari, siç tregon bashkëshortja e vëllait të tij jetonte në Greqi me nënën dhe babanë e tij. Sakaq, ajo ka bërë me dije se bashkë me vëllezërit e motrat e Pëllumbit po përgatiten ta shoqërojnë nesër në banesën e fundit.
“Varrimi do të bëhet në vendin tonë, në Shqipëri”, përfundon ajo.
