Në momentin kur kreu i Grupit Parlamentar të PS, Taulant Balla mori fjalën në Kuvend, disa nga deputetë e Partisë Demokratike nxituan të bllokojnë foltoren e Kuvendit.
Albana Vokshi dhe Luçiano Boçi qëndruan shumë pranë Ballës, ndërsa oficerët e Gardës rrethuan kreun e Grupit të PS, i cili nuk e kurseu ironinë ndaj këtij incidenti.
Balla iu drejtua Luçiano Boçit duke i thënë: “Po kjo ça është? Ulu se nuk më shohin kolegët… dukeni si kinostudio të foltores, me vërtetë jeni përfaqësues të foltores, por foltorja është e të gjithëve jo vetëm e juaja”.
Më pas Balla iu referua kërkesës së demokratëve për mocion me debat me kryeministrin Edi Rama duke nënvizuar se nuk mund të bëhet sot për shkak të axhendës zyrtare të shefit të qeverisë.
“E kam për turp të jesh këtu. Foltorja është e të gjithëve, nuk është vetëm e juaja. Kuvendi i Shqipërisë, në lidhje me mocionin me debat ka marrë vendim dhe vendimi është në konsultim edhe me zyrën e kryeministri, i cili ka garantuar se do jetë prezent në datën 2 mars. Më duket e papranueshme që ju kërkoni që debati të bëhet sot, kur dihet se sot kryeministri është në Japoni”, tha Balla.
Por, pa e përfunduar fjalën Balla, deputetët demokratë kanë ndezur një aparaturë e cila krijon zhurmë akustike.
“Ju bëj thirrje të tërhiqeni nga kjo qasje. Pas datës 3 nuk do jeni më kështu, se gjykata do marrë vendim”, iu përgjigj atyre Balla, pas ndezjes së kësaj pajisje zhurmuese.
