Në takimin me drejtuesit e departamenteve të Partisë Demokratike, kryedemokrati Berisha përveç udhëzimeve që ju ka dhënë, i ka motivuar me besimin që ka për fitoren e asaj që ai e quan revolucion.
Gjatë fjalës së tij, kryedemokrati Berisha është shprehur se PD do të vijë në pushtet vetëm me votën e lirë teksa ka shtuar se do të zhvillojnë një revolucion paqësor duke përdorur të gjitha metodat e mosbindjes civile.
“Do të vijmë në pushtet vetëm me votën e lirë. Ne do të ndjekim dhe njëherë revolucion paqësor me elementë të qarta të mosbindjes civile sepse ne jemi një forcë demokratike, askush nuk mund të na intimidojë. Edi Rama është i interesuar për dhunë, edhe të tjerë. Por për ne, ne kjo jemi, forcë politike e cila beson në fuqinë e mosbindjes civile”, tha Berisha.
Për të gjithë anëtarët e PD-së dhe intelektualët, kryedemokrati Berisha bëri një thirrje:
“Thirrja ime për ju, për të gjithë anëtarët dhe intelektualët: Të angazhohen në këtë lëvizje në mënyrë që të arrijmë qëllimin, t’i dalim zot vendit në një moment kritike. Çdo intelektual kurrë nuk duhet të harrojë se thelbi është një rrezik më i madh, kështu që të bëjmë gjithçka, të afrojmë çdo vlerë dhe të shkojmë të sigurtë drejt një fitoreje të këtij revolucioni që do të jetë fitore e shoqërisë shqiptare”.
