Ka nisur me tension edhe seanca e sotme plenare pasi disa deputetë të opozitës janë përjashtuar nga Kuvendi.
Protesta e opozitës që ka nisur jashtë parlamentit, po zhvillohet paralelisht edhe brenda në sallën e Kuvendit. Duke iu drejtuar skandalit “McGonigal”, deputetja e PD-së Albana Vokshi tha se Ramën nuk e shpëton dot askush.
“Një gjë ta keni të qartë edhe ju deputetë të mazhorancës që me forcën e kartonit po shkelni çdo nen të Kushtetutës e të rregullores. Çfarëdo manovre të bëni, çfarëdo hile të bëni, nuk e shpëtoni dot Edi Ramën!”, tha Vokshi.
Kujtojmë që prej disa javësh tashmë nuk zhvillohet një seancë normale, pasi jashtë Kuvendit protestojnë mbështetësit e Berishës, ndërsa brenda deputetët e opozitës të cilët bllokojnë foltoren dhe fishkëllejnë me bilbila, teksa kërkojnë që kryeministri Edi Rama të paraqitet në Kuvend për të dhënë “llogari” për implikimin e tij në aferën “McGonigal”. Berisha ka bërë të qartë që demokratët do të vijojnë aksionin opozitar brenda dhe jashtë parlamentit.
