Dinamika e plagosjes me armë zjarri që tronditi qendrën e qytetit të Librazhdit mbrëmjen e djeshme është zbardhur nga policia, që ka shpallur në kërkim autorin 25-vjeçar, Albi Biçaku.
Forcat e rendit konfirmojnë se plagosja e 35-vjeçarit Shpëtim Skura teksa ishte duke konsumuar kafen në një lokal në lagjen nr.1, ishte aksidentale, pasi nuk ka qenë ai objektivi i Biçakut, i cili qëlloi me pistoletë nga një mjet tip “Audi” në lëvizje.
Nga veprimet hetimore dyshohet se Albi Biçaku tentoi të vriste shtetasin me iniciale R.H, i cili gjithashtu ishte ulur në lokalin ku po konsumonte kafen Skura.
Qëllimi i të riut ishte të ekzekutonte këtë person, pasi ai ishte konfliktuar më parë me vëllanë e tij Renard Biçaku.
Ky i fundit, 33 vjeç është vënë në pranga nga policia pasi gjatë kontrollit në banesën dhe në dyqanin që ai dhe autori i ngjarjes zotërojnë, u gjet 1 armë zjarri pistoletë, 1 kallëp me lëndë plasëse e programuar për shpërthim në distancë, municion luftarak dhe një sasi kanabisi.
Sakaq, vjon puna për kapjen e shtetasit Albi Biçaku, i cili njihet si person problematik në qytet, dhe nga policia i ndaluar disa herë për shitje të lëndëve narkotike.
Njoftimi i policisë:
Pas ngjarjes së ndodhur mbrëmjen e djeshme, në një lokal, në lagjen nr.1, ku mbeti i plagosur me armë zjarri 35-vjeçari Shpëtim Skura, grupi hetimor, shërbimet e Komisariatit të Policisë Librazhd dhe strukturat operacionale të Drejtorisë Vendore të Policisë Elbasan, nën drejtimin e Prokurorisë pranë Gjykatës së Rrethit Gjyqësor Elbasan, vijuan veprimet hetimore dhe ato operacionale, me qëllim zbardhjen e rrethanave të ngjarjes dhe kapjen e autorit.
Nga veprimet hetimore dyshohet se rreth orës 18:00, shtetasi , Renard Biçaku (vëllai i shtetasit Albi Biçaku) është konfliktuar fizikisht me shtetasin R. H. Më pas, shtetasi Albi Biçaku ka shkuar në lokalin ku po qëndronte shtetasi R. H., ka qëlluar me armë zjarri në drejtim të tavolinës ku ishte ulur ai dhe si pasojë është plagosur aksidentalisht në këmbë shtetasi Shpëtim Skura, i cili ndodhet jashtë rrezikut për jetën.
Në vijim të veprimeve për këtë rast, u arrestua në flagrancë vëllai i autorit të kësaj ngjarjeje, shtetasi Renard Biçaku, 33 vjeç, banues në Librazhd, për veprat penale “Prodhimi dhe mbajtja pa leje e armëve, armëve luftarake dhe municionit” dhe “Prodhimi dhe shitja e narkotikëve”.
Arrestimi i 33-vjeçarit u bë pasi gjatë kontrollit në banesën dhe në dyqanin e përbashkët me vëllanë e shpallur në kërkim si autor i plagosjes, shërbimet e Policisë gjetën dhe sekuestruan 1 armë zjarri pistoletë, 1 kallëp me lëndë plasëse e programuar për shpërthim në distancë, 1 karikator automatiku, 1 krehër pistolete, 136 fishekë dhe rreth 560 gamë kanabis.
Vijon puna për kapjen e shtetasit Albi Biçaku.
Materialet i kaluan Prokurorisë pranë Gjykatës së Shkallës së Parë Elbasan, për veprime të mëtejshme.
