Një bombë merkatoje vjen nga Spanja mbi Dushan Vlahoviçin. Sipas asaj që raporton “AS”, sulmuesi i Juventusit ka përfunduar në shënjestrën e Realit të Madridit.
Ky është vijim madje i lajmeve që i njëjti burim kishte grumbulluar prej javësh mbi bomberin serb, duke qenë se sërish e përditshmja madrilene garanton se 23-vjeçari ka qenë vërtet fare pranë largimit nga Torino, për një shifër mes 100 dhe 120 milionë eurove, por në fund ka qenë menaxheri i Vlahoviçit ai që ka frenuar gjithçka dhe ndoshta arsyeja mund të jetë pikërisht Reali i Madridit.
Klubi që kishte vendosur të bënte çmendurinë e radhës në merkato ka qenë Mançester Junajtid, i cili pasi kishte bindur Juventusin me këto numra marramendës dhe kishte marrë leje që të fliste me vetë futbollistin për një transferim të mundshëm, në fund menaxheri Darko Ristiç ka vendosur që të marrë ende kohë deri në verë, lidhur me një tjetër destinacion për klientin e tij, më konkretisht klubin që të gjithë ëndërrojnë.
Dhe ja tek vjen konfirmimi i radhës se në “Santiago Bernabeu” janë të bindur se Dushan është pasardhësi i denjë i Karim Benzemasë, i cili pas dy sezoneve prej një jashtëtokësori, sivjet ka nisur që të frenohet nga disa probleme fizike të vazhdueshme dhe sigurisht që me moshën që avancon (35 vjeç aktualisht), pa dyshim që vazhdimësia është diçka e vështirë për t’u gjetur.
