Ish-kancelarja gjermane Angela Merkel ra viktimë e dy shakaxhinjve rusë , të cilët e telefonuan duke pretenduar se po komunikonte me ish-presidentin ukrainas Petro Poroshenko, sipas pjesëve të bisedës të publikuara të hënën.
“Mund të konfirmoj një telefonatë në të cilën telefonuesi pretendonte se ishte ish-presidenti i Ukrainës, Petro Poroshenko”, tha një zëdhënëse e Merkelit për Deutsche Presse-Agentur.
Telefonata është bërë më 12 janar dhe komunikimi nga gjermanishtja në ukrainisht është kryer nga shërbimi përkatës i ministrisë së jashtme, shtoi zyra e Merkelit.
Në regjistrim, sipas Politico, “Poroshenko” pyeti Merkelin për luftën në Ukrainë, marrëveshjen e Minskut, diktatorin bjellorus Alexander Lukashenko dhe kërkesat e Polonisë për dëmshpërblime për krimet e Gjermanisë naziste.
Në fund, në fakt, shakatari i sugjeroi që të vazhdonte të fliste në rusisht për të “fryrë Putinin”. Merkel u përgjigj: “Jo, sigurisht që nuk do ta bëjmë… rusishtja ime është edhe më keq se sa ishte në 2014“.
Merkel tha në regjistrim se marrëveshja e Minskut i kishte dhënë Ukrainës kohë të çmuar. Megjithatë, ajo nuk tha asgjë zbuluese, foli në favor të unitetit të Perëndimit në konfliktin me Rusinë dhe theksoi se nuk dëshiron të krijojë një “front të dytë publik” përtej kanaleve zyrtare.
“Do të isha mirë nëse kjo bisedë do të qëndronte mes nesh dhe asgjë e rëndësishme nuk do të dilte në shtyp”, tha Merkel.
Në fund u duk se Merkel nuk ndihej rehat me disa pyetje dhe donte t’i jepte fund telefonatës.
