Trajneri i Partizanit, Xhovani Kolela, ka folur për mediat, në prag të sfidës që skuadra e tij do të luajë të shtunën ndaj Erzenit.
Kolela u shpreh se skuadrës i duhet edhe pak kohë për tu përmirësuar. Tekniku italian, ka vlerësuar maksimalisht skuadrën shijakase, ndërsa shtoi se është momenti i duhur që Partizani të marrë fitoren e parë ndaj Erzenit për këtë sezon.
“Duhet të përmirësojmë shumë gjëra akoma, por na duhet kohë, pasi skuadra ka ndryshuar. Ata që kanë ardhur nuk janë ambientuar ende pasi duhet që të jenë në gjendjen e tyre optimale fizike, prandaj na duhet edhe pak durim. Të gjithë lojtarët janë pak a shumë në të njëjtat kushte, ne do të shohim për të marrë maksimumin prej secilit, duke kërkuar edhe pikët, pasi në fund për to luhet.
Erzeni është një kundërshtar i fortë dhe këtë e pashë edhe në ndeshjen e fundit, ku pati një rezultat karamboleks. Janë rival direkt për ne, ndodhen vetëm tri pikë larg dhe kjo do të thotë se kanë bërë mirë. Është momenti i duhur që të marrim fitoren e parë ndaj tyre, pasi na kanë mundur në fazën e parë”, tha ai.
