Policia e Vlorës ka arrestuar një 25-vjeçar të shpallur në kërkim nga autoritet spanjolle si pjesë e një grupi kriminal që merrej me trafikun e lëndëve narkotike. 25-vjeçari është ndaluar nga policia shqiptare me qëllim ekstradimin e tij drejt Spanjës.
Ky është arrestimi i dytë brenda 24-orëve për pjestarët e të njëjtit grup kriminal që operonte në Spanjë. Shtetasi Ulliam Sokoli dhe shtetasi Xhuljano Hajrulla, i cili u arrestua ditën e djeshme nga Policia, në Vlorë, akuzohen si pjesëtarë të të njëjtit grup kriminal në Spanjë, që merret me kultivimin e marijuanës.
“Në kuadër të operacionit “Escape”, u kap në Rrugën Transballkanike dhe u arrestua përkohësisht, shtetasi: U. S., 25 vjeç, banues në Vlorë.
Ky shtetas ishte shpallur në kërkim ndërkombëtar nga Interpol Madrid, pasi Gjykata Qendrore e Instruksionit në Spanjë, me vendimin e datës 01.02.2023, i ka caktuar masën e sigurisë “Arrest në burg”, për veprat penale “Trafik narkotikësh”, “Grup kriminal” dhe “Mashtrim në fushën e energjitikës”, parashikuar nga legjislacioni penal spanjoll”– njofton policia.
Materialet iu referuan Prokurorisë, për veprime të mëtejshme.
