Policia ka rënë në gjurmët e një tjetër vile në Fier që ishte transformuar në “shtëpi bari” dhe 3 katet e saj shërbenin për të kultivuar kanabis sativa nëpërmjet llampave.
Uniformat blu bëjnë me dije se në janë arrestuar 3 shtetas, mes tyre pronari i vilës Erjon Marini, elektricisti Behar Fata dhe faturisti i OSHEE-së Klajdi Gremi. Dy punonjësit e OSHEE akuzohen për veprën penale “Shpërdorimi i detyrës” pasi dyshohet se kanë ndihmuar pronarin për të kultivuar bimën narkotike në këtë “shtëpi bari”.
Nuk është rasti i parë kur punonjës të OSHEE por edhe efektivë policie janë të implikuar në grupe të ndryshme kriminale të kultivimit të bimëve narkotike. Paradoksi është me të vërtet i rëndë në Shqipëri ku çdo ditë arrestohen të moshuar që e kanë të pamundur të paguajnë energjinë elektrike pasi me pensionin e ulët nuk arrijnë dot as të ushqehet dhe të marrin ilaçe, kurse në krahun tjetër krimi dhe droga favorizohet nga OSHEE dhe policia që mbyll sytë duke marrë ryshfet.
Gjithashtu policia bën me dije se nga kjo vile ka sekuestruar 181 bimë narkotike të cilat ishin kultivuar në vazo që u gjetën brenda ambienteve të përshtatura me llamba, dhjetëra llamba dhe pajisje të tjera elektrike që ishin instaluar në 5 ambientet e banesës.
“Në vijim të punës për goditjen e tentativave për kultivim të bimëve narkotike në ambiente të hapura e të mbyllura, si rezultat i kontrollit të imtësishëm të territorit, mbështetur në inteligjencën policore se në fshatin Dërmënas, në vilën e shtetasit E. M. kultivoheshin bimë narkotike, është organizuar dhe finalizuar nga Komisariati i Policisë Fier, në bashkëpunim me Seksionin për Hetimin e Narkotikëve të DVP Fier, operacioni policor i koduar “Vila”. Në kuadër të këtij operacioni, në përfundim të veprimeve të para hetimore u bë arrestimi në flagrancë i shtetasve:
– E. M. alias Xh. G., 44 vjeç, banues në Dërmënas, Fier, për veprat penale “Prodhimi dhe shitja e narkotikëve” dhe “Vjedhja e energjisë elektrike”. Ky shtetas është pronari i vilës në të cilën Policia zbuloi 5 ambientet e përshtatura për kultivim të bimëve narkotike;
-K. G., 40 vjeç, banues në Fier, me detyrë faturist i OSHEE-së, për veprën penale “Shpërdorimi i detyrës”;
-B. F., 47 vjeç, banues në Fier, me detyrë elektricist i OSHEE-së, për veprën penale “Shpërdorimi i detyrës””, thuhet në njoftimin e policisë
Vijon puna për identifikimin dhe kapjen e personave të tjerë të dyshuar të përfshirë në këtë veprimtari kriminale. Në bashkëpunim me Prokurorinë, vijon dhe hetimi pasuror ndaj pronarit të vilës, shtetasit E. M. Materialet procedurale i kaluan Prokurorisë pranë Gjykatës së Rrethit Gjyqësor Fier, për veprime të mëtejshme.
