Seanca plenare e kësja të henë po zhvillohet jo vetëm brenda sallës së Kuvendit por edhe në shesh, “në parlamentin e popullit” siç e quajtën deputetët e Partisë Demokratike.
Protestuesit që janë grumbulluar në rrugën “Xhorxh Bush” me parrulla në duar kanë ironizuar kryeminsitrin Edi Rama në lidhje me aferën Mcgonigal, ndërkohë që atyre u janë bashkuar edhe deputetët e PD që nuk u lejuan nga Garda të hynin në sallë.
Teksa kanë nisur edhe përplasjet e para mes protestuesve dhe policisë, në një tentativë për të çarë kordonin e forcave të rendit, deputetja Albana Vokshi foli nga mesi i turmës duke akuzuar kryeministrin Rama për korruptimin e një ish-zyrtari të FBI-së dhe si i gjen paratë për të tilla skandale e jo për hallet e shqiptarëve.
“Ka para për të rritur pensionet e pagat por Rama i merr dhe ja jep me valixhe McGonigal për përftime personale e për të shkatërruar opozitën. U përjashtuam se kërkuam 3 mocione. I hodhi poshtë Lindita me urdhër të Ramës. Ne nuk dorëzohemi”, tha ajo.
Vokshi u ndal edhe incidenti me Gardën duke thënë se qytetarët dhe opozita problemin nuk e kanë me oficerët apo policinë, përkundrazi lëshoi një thirrje në drejtim të tyre duke u kërkuar të bashkohen me popullin.
“Sot vuri Gardën e policisë përballë nesh. Ne nuk e kemi me policinë e Gardën, janë bij nënash. I bëj thirrje të bashkohen me popullin e të mos i shërbejnë Ramës e Rilindjes. PD është e vendosur t’i dalë zot Shqipërisë e të mbroje demokracinë. një thirrje për çdo qytetar: Ejani bashkohuni me ne. Është çështje demokracie jo partie politike”, deklaroi deputetja e PD.
Sakaq, kujtojmë se kjo është protesta e dytë që kur kryedemokrati Sali Berisha paralajmëroi një valë protestash deri në dorëheqjen e kryeministrit Rama.
