Tre persona të tjerë, përfshirë eurodeputeten greke Eva Kailin, tashmë janë burgosur për skandalin “Katargate” që çoi në një sërë arrestimesh në Bruksel.
Eurodeputeti belg Marc Tarabella , i cili akuzohet kryesisht për korrupsion, është lënë në paraburgim këtë të shtunë si pjesë e hetimeve për përfshirjen e dyshuar të Katarit dhe Marokut në vendimet e Parlamentit Evropian.
Vendimin për eurodeputetin socialist 59-vjeçar e njoftoi zyra e prokurorit federal.
“Ai u mbajt në paraburgim pasi u akuzua për korrupsion, pastrim parash dhe anëtarësim në një organizatë kriminale“, tha për AFP Erik van der Sypt, një zëdhënës i zyrës së prokurorit federal.
I dyshuari kryesor në këtë rast, italiani Antonio Panzeri , një ish-deputet i Parlamentit Evropian, pranoi në janar se ai orkestroi mashtrimin. Ai arriti një marrëveshje me prokurorët që parashikon një dënim me burg të kufizuar deri në një vit, në këmbim të deklaratave të sakta për mashtrimin dhe personat e përfshirë.
Sipas shtypit belg, Pancheri e implikoi Tarabelën para hetuesve në dhjetor, pak pas arrestimit të tij. Ai pretendoi se e kishte paguar “midis 120,000 dhe 140,000 euro” për ndihmën e tij në çështjet e lidhura me Katarin.
Tarabella mohoi çdo keqbërje dhe kërkoi të dëshmonte për të shpjeguar veten.
Gjyqësorit belg iu desh të priste deri në përfundimin e procedurës së heqjes së imunitetit në Parlament më 2 shkurt për të shqyrtuar çdo masë shtrënguese.
Në të njëjtin hetim, një tjetër eurodeputet socialist, Andrea Coçolino i Italisë, të cilit gjithashtu iu dha imuniteti më 2 shkurt, u arrestua dje, të premten, në Itali me një urdhër arresti ndërkombëtar, konfirmoi sot Van der Sypt.
Drejtësia belge tani është në pritje të ekstradimit të tij.
