Për deputetin e Partisë Demokratike, Luan Baçi, qytetarët që ishin të pranishëm në protestën e ditës së sotme, prisnin një tubim më të fortë nga opozita.
Baçi tha në emisionin “Review” se nuk duhet përjashtuar as termi dhunë pasi një kryeministër si Rama kështu largohet, por tha se duhet qëndruar brenda kufijve demokratikë dhe frymës pluraliste të tubimeve.
“Për një gjë më vjen pak keq, pritshmëria e njerëzve ishte për një protestë më të fuqishme dhe të fortë. Por duhet të kuptojmë se çfarë kuptojmë me pritshmëri të fortë protestuesit dhe çfarë duhet të jetë e fuqishme dhe e fortë. Kjo ishte një protestë dhe një paralajmërim shumë i fortë ndaj Edi Ramës. Paralajmërimi i qytetarëve ishte që protestën nuk e donin kështu, por i frenuam ne. Protestë të dhunshme nuk e di se çfarë kuptoni ju. Protestë shumë herë më të fuqishme, por edhe dhunë duhet, se ky kryeministër vetëm me dhunë ikin”, tha Baçi.
Ai theksoi gjithashtu se protesta ishte një paralajmërim për kryeministrin.
“Paralajmërim është për kryeministrin se një masë e tillë qindra mijëra qytetarë nuk e bëjnë për burrë atë kryeministër që na bën poçe si Koçi i Ollgës. Ata qytetarë nuk ikën për t’u kthyer, por do të kthehen herë pas here dhe atë mesazh do ta japin nëse nuk dëgjon Edi Rama”, shtoi ai.
