Në mbyllje të protestës së sotme, pasi shënjoi katër institucionet e turpit dhe së keqes në Shqipëri, kreu i PD Sali Berisha nga selia blu dha edhe një mesazh për një tjetër tubim para Parlamentit ditën e hënë.
Teksa nga PS e komentuan thirrjen e tij për protestë të hënën si të gabuar duke qenë se qeveria ka shpallur ditë zie kombëtare në solidarizimin me dhimbjen e popullit turk për viktimat e tërmetit të së hënës, Berisha tha se marshimi ishte thjesht një sinjal dhe se në qoftë se vendoset të mos ketë parlament do të respektohej dita e zisë.
“I them Damianit, protesta i realizoi 100% qëllimet e tij. Marshimi ishte thjesht një sinjal, një mesazh që e ka marrë shumë mirë. Në qoftë se nuk ka parlament unë nuk kuptoj se nuk duhet bërë parlament se ka ditë zie. Ulet flamuri dhe ndërpriten aktivitetet sportive dhe kulturore, nuk ndërpriten aktivitetet politike, por në qoftë se vendoset të mos ketë parlament ne do respektojmë ditën e zisë”, deklaroi Berisha.
Por disa orë pas mesazhit të liderit të opozitës, Kuvendi ka konfirmuar se seanca e parashikuar për t’u zhvilluar ditën e hënë nuk do të shtyhet dhe do të nisë nga pra 17:00.
“Ju njoftojmë se seanca plenare Kuvendit të Shqipërisë do të zhvillohet ditën e hënë, datë 13 shkurt, ora 17:00. (Urdhër nr.8, datë 10.02.2023, i Kryetares së Kuvendit, znj. Lindita Nikolla)”, thuhet në njoftimin e Kuvendit.
