Bordi shtetëror i mbrojtjes së kafshëve në Indi u ka kërkuar qytetarëve që të festojnë ‘Ditën e Përqafimit të Lopës’ më 14 shkurt të këtij viti, në vend të Ditës së Shën Valentinit.
Në një deklaratë zyrtare të lëshuar të mërkurën, agjencia qeveritare i përshkroi lopët si “shtylla kurrizore” e kulturës indiane dhe ekonomisë agrare, duke thënë se “përqafimi i lopëve do të sjellë pasuri emocionale dhe do të rrisë lumturinë individuale dhe kolektive“.
Ai shtoi se përqafimi i lopëve do të ndihmonte në adresimin e kërcënimit me, të cilin përballen traditat, që e kanë origjinën nga tekstet e lashta fetare hindu të Vedave dhe janë në rrezik të zhduken për shkak të përhapjes së traditave perëndimore.
Kjo është hera e parë që një vend i tërë ka dalë kaq fort kundër festës së të dashuruarve. Mirëpo, propozimi i Këshillit të Shtetit shkaktoi reagime të forta në rrjetet sociale.
“Nuk jam i sigurt nëse bagëtitë kanë dhënë pëlqimin e tyre, por ne do ta zbulojmë”, tha me ironi një përdorues i Twitter-it.
Vihet re se hindutë e devotshëm besojnë se lopa është një kafshë e shenjtë që duhet adhuruar pasi përfaqëson Nënën Tokë. Sidoqoftë, India nuk u kushtonte gjithmonë një rëndësi të tillë.
Në librin e tij “Miti i lopës së shenjtë”, historiani DN Jha argumenton se shenjtëria e lopës është një traditë relativisht e re.
“Lopa tenton të bëhet me kalimin e kohës një mjet politik në duart e pushtetarëve [s.s. të cilët ndihen të kërcënuar nga myslimanët”, shkruan ai ndër të tjera.
Në fakt, gjatë dekadës së fundit, partia në pushtet e udhëhequr nga kryeministri Modi ka bërë që ndjekësit e devotshëm hindu të argumentojnë se festimi i romancës në ditën e Shën Valentinit shkon kundër vlerave tradicionale indiane.
