Një tërmet i fuqishëm ka goditur kufirin turko-sirian, duke vrarë mijëra njerëz dhe duke lënë nën rrënoja me qindra persona të tjerë. Lëkundjet fatale zgjatën rreth një minutë dhe u ndjenë deri në Qipro, Egjipt dhe Liban.
Meqënëse vazhdon puna e ekipeve të shpëtimit për të nxjerrë njerëzit nga rrënojat numri i viktimave ka shkuar në më shumë se 20,000.
Tërmeti shkaktoi dëme të jashtëzakonshme në jug të Turqisë dhe në veri të Sirisë. Lagje të tëra janë rrafshuar. Mijëra njerëz kanë mbetur të pastrehë tani në dimër kur temperaturat janë nën zero gradë.
Tërmeti i fuqishëm në orët e mëngjesit të së hënës (06.02.2023), sipas të dhënave të Autoritetit turk të Mbrojtjes nga Katastrofat Afad kishte një forcë goditëse 7,7 ballë. Shumica e njerëzve në atë kohë ishin ende në gjumë. Të hënën pasdite pati edhe një tjetër goditje prej 7,5 ballë po në të njëjtin rajon. Gjithashtu janë regjistruar shumë goditje të tjera pasuese. Lëkundjet e tokës janë ndjerë deri në Liban dhe në Qipro e madje këto lëkundje janë kapur edhe nga aparaturat matëse në Groenlandë.
Presidenti i Turqisë Rexhep Tayp Erdogan shpalli një javë zie kombëtare në vend. Ai e cilësoi këtë si tërmetin më të fuqishëm që nga viti 1939. Atëherë në provincën lindore Erzincan patën gjetur vdekjen 33.000 vetë.
Premtime për ndihma nga e gjithë bota
Sekretari i Përgjithshëm i OKB-së, António Guterres u shpreh “thellësisht i prekur” për këtë katastrofë. “OKB është e gatshme të japë ndihmë emergjence”,- siguroi Guterres.
Kancelari i gjermanisë Olaf Scholz në një telegram ngushëllimi i shprehu presidentit Erdogan “dhimbjen e thellë”. Gjermania do të ndihmojë për përballimin e fatkeqësisë, theksoi kancelari.
Bashkimi Europian do të mbështesë edhe Sirinë e prekur nga kjo katastrofë. Premtimet për ndihma janë dhënë edhe nga SHBA, Rusia, Ukraina, India, Pakistani, Irani, Izraeli, Britania e Madhe, Greqia dhe shumë shtete të tjera.
Njerëz nga e gjithë bota kanë mbërritur në aeroportin e Stambollit për të ndihmuar në përpjekjet e shpëtimit zonat jugore të Turqisë që janë prekur më së shumti nga tërmeti.
Në pamje shihen me mijëra njerëz që janë në radhë për të kaluar sportelin dhe për të nisur misionin e tyre të ndihmës.
