Në kulmin e krizës ekonomike, ku qytetarët shqiptarë po vuajnë pasojat e inflacionit, rritjes së çmimit të karburanteve dhe produkteve të shportës bazë, kryeministri Edi Rama duket se po përpiqet të fshehë dështimin e qeverisë me një vendim për të rritur sërish pagën minimale në vend.
Rama duket se ka gjetur një zgjidhje artificiale për të “arnuar” xhepat e shqiptarëve të goditur rëndë nga rritja e çmimeve, siç ishte edhe vendimi i fundit i kompanive të mëdha të përpunimit të qumështit për të ngritur deri në 37% duke nisur nga 15 shkurti, çmimet e bulmetit në të gjitha pikat e shitjes me pakicë, por edhe prej dështimit të Paketës Sociale që qeveria aplikoi në fund të dhjetorit.
Sipas asaj që shefi i qeverisë tha sot në një takim me nxënës që asistohem me bursë, pas disa javësh do të hyjë në fuqi vendimi i ri për rritjen e pagës minimale, që aktualisht është 32.000 lekë.
Rama tha se qoftë për sektorin publik por dhe atë privat, paga minimale do të bëhet 40 mijë lekë të reja, duke shtuar edhe 20 mijë plus në premtimin fillestra që dha në fund të vitit 2022.
“Mbase është gjëja e duhur për të ndarë me ju që paga minimale shumë shpejt do të shkojë në 40 mijë lekë. Domethënë çështje disa javësh. Dhe do të fillojë të aplikohet brenda shumë pak muajsh për të gjithë. Nuk duam të ketë pagë më të ulët se 40 mijë lekë në Republikën e Shqipërisë qoftë në sektorin publik qoftë në sektorin privat”, u shpreh ai.
Kryeministri tha gjithashtu se qeveria është duke punuar që paga minimale brenda dy viteve të rritet në 45 mijë lekë.
“Ne besojmë që kjo rritje është e duhura dhe jo vetëm kaq por besojmë po ashtu që duke kontribuar edhe ne me një mekanizëm që jemi duke e përfunduar, paga minimale do rritet në vijim dhe duam që brenda 2 viteve të shkojë në 45 mijë Lekë. Kështu që juve që sapo nisni shkollën kini parasysh që me çdo rritje të pagës minimale ju do të merrni shtesën mbi pagën minimale me të cilën e filloni shkollën”, theksoi Rama.
Por, pavarësisht rritjes së pagës minimale që mund të realizohet, gjasat janë që vendimi të mos ndikojë aspak te buxheti i familjeve shqiptare për aq kohë sa inflacioni vijon rritjen me shifra të frikshme.
