Stadiumet në qytetet e Korçës, Durrësit dhe Vlorës parashikohet të transformohen në komplekse sportive me shërbime të ndryshme duke ndjekur modelin e stadiumit “Air Albania” në Tiranë.
Agjencia Kombëtare e Planifikimit të Territorit përmes Agjencisë së Prokurimit Publik njoftoi konkursin ndërkombëtar të projektimit të tre komplekseve sportivë të stadiumeve: Durrës, Korçë, Vlorë (në lote) “Qendrat e reja të qytetit”.
Loti i parë është “Rikonceptimi tërësor i parcelës dhe rizhvillimi i stadiumit të futbollit “Niko Dovana” dhe i zonës përreth” në Durrës. Loti i dytë “Rikonceptimi tërësor i kompleksit sportiv “Skënderbeu”, përfshirë rizhvillimin e stadiumit të futbollit “Skënderbeu”, rindërtimin/rikonceptimin e pishinës olimpike dhe Pallatit të Sportit” në Korçë.
I treti “Rikonceptimi tërësor i kompleksit rezidencial dhe sportiv të lagjes së kompleksit sportiv “Flamurtari”, përfshirë rizhvillimin e stadiumit të futbollit “Flamurtari”, rindërtimin/rikonceptimin e pishinës, dhe Pallatit të Sportit” Vlorë.
Në dokumentin që shoqëron procedurën thuhet se stadiumet në këto 3 qytete janë unike, për shkak të vendndodhjes së tyre qendrore. Qeveria shqiptare në konceptimin e stadiumit “Air Albania”, përfshiu stadiumin e futbollit në strukturën urbane përreth duke krijuar kështu një precedent të suksesshëm në integrimin pa probleme të sporteve komplekse në dinamikën ekzistuese të një qyteti të gjallë bashkëkohor.
Stadiumet e futbollit në Durrës, Korçë dhe Vlorë kanë të njëjtin potencial. Si të tillë, rindërtimi i këtyre stadiumeve, duke respektuar kriteret ndërkombëtare do të shërbejë si një katalizator për zhvillimin policentrik dhe krijimin e qendrave të reja të qytetit, ku sportet mund të bashkëjetojnë me veprimtari kulturore, sociale, arsimore dhe tregtare.
Stadiumet kategorizohen si në mënyrë domethënëse si infrastruktura masive që zënë zona mjaft të mëdha brenda qyteteve. Ata kërkojnë burime të jashtëzakonshme të ndërtohen, operohen dhe mirëmbahen. Përveç kësaj, shumicën e kohës, dritat e tyre janë të fikura deri në ndeshjen tjetër” thuhet në dokument.
AKPT nënvizon se qëllimi i këtij konkursi është që gjenerojnë ide dhe propozime të reja për rizhvillimin dhe rivitalizimin e komplekseve të stadiumeve të futbollit në Durrës, Korçë dhe Vlorë, duke krijuar objekte bashkëkohore që kanë përdorim të përzier si për nevojat sportive edhe një shumëllojshmëri të objekte komerciale, biznesi, tregtare dhe shërbime. Programet kulturore dhe edukative duhet të jenë pjesë e risisë që sjellin komplekset stadiumeve.
Stadiumet e reja të futbollit në Durrës, Korçë, dhe Vlorë do të mbajnë 10 mijë spektatorë secili dhe respektojnë rregulloret e UEFA-s për stadiumet e kategorisë 3. Projektet do të rikonceptohen në mënyrë holistike dhe rizhvillojnë komplekset sportive, duke përfshirë objektet e brendshme të gjykatës, ambiente noti (në Korçë dhe Vlorë), dhe pjesa tjetër e terrenit sportiv.
Arena Kombëtare pjesë e të cilit është stadiumi “Air Albania” u ndërtua përmes një procedure Koncesioni ku fituese rezultoi kompania ALBSTAR. I gjithë kompleksi u ndërtua kundrejt një kostoje 75 milionë euro nga të cilat 65 milionë u paguan nga kompania dhe 10 milionë euro nga Federata Shqiptare e Futbollit.
Kompania private ka përfituar nga kjo marrëveshje 20 mijë metra katrorë që shfrytëzohen për qëllime tregtare si dhe një kullë 24 katëshe ndërsa federata stadiumin dhe zyrat.
/Monitor.al/
