Kjo javë, sipas meteorologëve, është më e ftohta e stinës në dimrit, me termometrin që ka shënuar disa gradë nën zero. Ndërkohë, në shkollat publike të vendit është raportuar për probleme me sigurimin e ngrohjes për nxënësit.
Mungesë të ngrohjes, siç kanë treguar dëshmitë nga nxënësit e prindërit si dhe raportimet mediatike, janë shfaqur në shumë zona të vendit, mes tyre në kryeqytet. Përballimi i motit të ftohtë pa ngrohje është bërë e vështirë për nxënësit, ndërsa nga disa drejtori arsimore është urdhëruar shkurtimi i orëve të mësimit.
Këtë të Mërkurë, që shkollat vuajnë mungesën e ngrohjes, për herë të parë e pranoi dhe ministrja e Arsimit, Evis Kushi.
Në një reagim në rrjetet sociale, ajo shkruan se “për sa i takon situatës në terren dhe raportimeve në mënyrë të vazhdueshme nga zyrat arsimore, kemi kërkuar në mënyrë urgjente pajisjen me sistem ngrohjeje të 28 shkollave nga ana e bashkive respektive”.
“Ngrohja e institucioneve arsimore bëhet në disa mënyra: ngrohje qendrore me kaldajë, kondicionerë, ngrohës me energji elektrike, si dhe sobë me dru ose pelet. Duke vlerësuar këtë përpjekje të përbashkët me institucionet e pushtetit vendor dhe institucione të tjera, u kemi kërkuar bashkive të marrin masa për 51 shkolla ku ngrohja bëhet përmes sistemit elektrik por ngarkesa në rrjet ka sjellë vështirësi për ngrohjen optimale të tyre. Gjithashtu, i kemi informuar që të ndërhyjnë në 21 shkolla, ku sistemi i kaldajës ka nevojë për riparime apo furnizim me lëndë djegëse”, shton më tej Kushi.
Ajo bën me dije po ashtu se në disa shkolla të zyrave arsimore Dibër dhe Devoll, ku temperaturat janë tepër të ulëta, orët e mësimit janë reduktuar me 10 minuta.
Nga ana tjetër, pavarësisht se nxënësit në shkolla nuk kanë ngrohje, siç ka njoftuar kryeministri Edi Rama, Shqipëria ka në hapësirë dy satelitët “Albania 1” dhe “Albania 2” që prej Janarit…
