Në mesin e të mbijetuarve nga dy tërmetet të shkallës 7.8 dhe 7.6 të shkallës rihter që goditën rajonin e Gaziantepit në Turqi, e që deri më tani kanë shkaktuar mbi 2 mijë viktima e 10 mijë të plagosur, ndodheshin edhe qytetarë të Shqipërisë.
Bruno Dodi është një prej tyre, i cili fatmirësisht ka arritur të shpëtojë mrekullisht pas valës së lëkundjeve pasi ndodhej në katin e 12 të një hoteli.
Ai rrëfeu në një intervistë për Euronews Albania përjetimin që pati gjatë tërmetit shkatërrimtar që goditi Turqinë.
Duke shpërthyer në lot, Dodi tha se gjatë vrapimit nëpër shkallë shpëtoi një fëmijë të një nëne që mbante në krah tre bijtë e saj.
“Unë ndodhesha në kat të 12-të në hotel, u mundova të hapja derën se isha shtrirë. Hapa derën dhe ika me vrap nga shkallët. Shikoja në shkallë njerëz të shtrirë se binin nga lëkundjet, por dhe nga paniku. Aty pashë një grua me dy-tre fëmijë dhe mora një nga ata fëmijët dhe zbrita nga shkallët. Zoti e di si kam dalë. Gjithë personat dolën jashtë, disa ngecën nëpër dhoma se u bllokuan dhe dyert. Ishte një tërmet shumë i fortë, i frikshëm. Ka njerëz nëpër rrënoja, me baballarë, me fëmijë me gra dhe me burra në rrënoja. Mos të harrojmë që Turqia na ndihmoi në tërmetin e vitit 2019”, tha Dodi.
Ai zbulon se situata është shumë e rëndë pasi pasgoditjet vijojnë çdo 15 minuta dhe se njerëzit nuk mund të dalin jahstë për shkak të të ftohtit
“Çdo 15 minuta ka lëkundje të fuqishme dhe ky është nnjë problem i madh se jashtë është një i ftohtë i paparë. Janë të angazhuar ushtria dhe çdo institucion për të ëkrkuar në rrënoja, është një situatë shumë e rëndë” tha ai.
