Dionis Abdiaj pas aktiti heroik pasi shpëtoi një fëmijë 1 vjeç që po digjej nga flakët është kthyer në personazhin e ditës në Greqi.
Ngjarja ndodhi dy ditë më parë në Lamia, teksa ditën e sotme, Dionisi ishte i ftuar në emisionin “Shqipëria LIVE” tha se nuk e mendoi në asnjë moment rrezikun dhe ndërhyri menjëherë për ta shpëtuar foshnjën.
“Unë po shkoja për në shtëpi dhe dëgjova një fëmijë që qante. U afrova dhe pashë shtëpinë që ishte e rrethuar nga flakët. Fëmija më tha që foshnja ishte aty brenda. Menjëherë hodha xhaketën dhe i dhashë një goditje të fortë dritares së dhomës. Hyra brenda dhe mora foshnjën që ishte i rrethuar nga flakët. Në atë moment nuk e mendova fare, nuk kisha frikë”, tregoi Dionis Abdiaj.
Nga ana tjetër, babai i tij tha se deri më tani nuk kanë marrë asnjë shpërblim, por nuk i intereson pasi ai është krenar për veprimin e të birit.
“Nuk kemi marrë asnjë shpërblim. Nuk ka shumë rëndësi të marrim apo jo gjë. Ta vlerësojnë apo jo, mua më mjafton që djali më ka bërë krenar. I ka bërë krenarë të gjithë shqiptarët. Akoma vazhdon ajo që për çdo gjë që ndodh në Greqi, sulmohen shqiptarët.”- tha babai.
