Kur na ndajnë edhe 5 ditë nga protesta e thirrur nga Partia Demokratike për t’u zhvilluar më 11 shkurt, një tubim ku marrin pjesë një grup qytetarësh, anëtarë të FRPD dhe simpatizantë të opozitës është duke u zhvilluar shumë pranë banesës së kryeministrit Edi Rama në Surrel.
Ata janë mbledhur rreth 1 km larg nga shtëpia e kryeministrit dhe kërkojnë njëzëri që Rama të largohet nga detyra, duke shkruar në pankartat që mbajnë në duar se “faktet kanë dalë në dritë”, lidhur me aferën McGonigal.
“Faktet dolën, jep dorëheqjen” shkruhet në një nga pankartat teksa në foto shfaqet kryeministri Rama dhe ish-zyrtari i FBI-së Charles McGonigal.
“Jemi këtu për t’i kthyer vizitën kryeministrit Edi Rama. Ai ka futur duart në xhepat e qytetarëve dhe ka hyrë brenda shtëpive tona. Ka tentuar të asgjësojë të gjithë zërat kundër tij për të mbajtur pushtetin e një autokrati. Ne jemi këtu dhe këtu do qëndrojmë çdo ditë. Një pikënisje dhe një thirrje për qytetarët që të na bashkohen më 11 shkurt. Ne jemi këtu, qytetarët shqiptarë janë këtu”, u shpreh një prej të rinjve në protestë.
Ai gjithashtu shtoi se mendon se Rama nuk meriton të jetë më në postin e kreut të qeverisë.
“Do jemi në mbështetje të çdo kauze qytetare. Ne mendojmë se Rama nuk meriton më të jetë në postin e kryeministrit. Ai ka tentuar asgjësimin e opozitës shqiptare. Ne nuk e duam më kryeministër”, shtoi protestuesi.
Nderkohe nje protestuese u shpreh: “E shikojmë që Shqipëria është kthyer në vendin e shkatërrimit. Arsimi është shkatërruar, drejtësia nuk funksionon. Të rinjtë po largohen. Thirrja ime është Edi Rama largohu që të rinjtë të qëndrojnë në Shqipëri”.
Ndërkohë në vendin ku po mbahet tubimi janë të pranishme dhjetëra forca policie. Në një komunikim fillestar, policia iu ka kërkuar protestuesve të mos vendosen në këtë zonë.
