Pëshkallëzohet protesta me banorët e Bërxullës të cilët thyen kordonin e policisë duke tentuar për të bllokuar rrugën e Rinasit.
Disa prej protestuesve janë përleshur me policinë ndërsa një vajzë dëgjohet teksa u thotë efektivëve që të mos e prekin me dorë pasi është e drejta e tyre që të mbrojnë pronën dhe banesat e tyre. Banorët kërkojnë që qeveria të plotësojnë kërkesat e tyre dhë më pas të vijojnë me ndërtimin e rrugës Thumanë-Kashar.
Një nga banorët paralajmëroi se pronat e tyre “do ti marrin vetëm të vdekur”, ndërsa shtoi se ajo rrugë do të bëhet “lapidar para se të ndërtohet”. Disa prej tyre tentuan që të bllokonin rrugën e Rinasit mirëpo u përballën me Policinë.
“Boldnews.al” sjell pamjet e përplasjes mes banorëve të Bërxullës dhe policisë në rrugën e Rinasit.
Një prej tyre u shpreh se Parlamenti nuk duhet të kishte mbyllur punimet për ish agjentin e FBI-së por duhet të kishte vijuar dhe të merret me problemet e qytetarëve. Banori theksoi se Rama nëse është i përfshirë në skandalin “McGonigal” duhet të merret si i pandehur në SHBA.
“Tubimi jonë është paqësor, ka ndodh një problem me agjentin e FBI, bllokohet parlamenti. Ai eshtë për hallet tona jo për ato të SHBA. Rama nëse ka bërë gjë, të shkojë si i pandehur, kolltukun nuk e ka gjithmonë pas vetes. Halli jon është ky, se janë 97 kryefamiljarë, merren tokë dhe pushtetarët bëjnë sikur janë të vdekur, nuk shohin” – tha banori.
Me thirrjet: “Do t’i mbrojmë shtëpitë tona me gjak” banorët e Bërxullës, banesat dhe pronat e të cilëve preken nga ndërtimi autostradës Thumanë-Kashar, bënë thirrje për një bashkëbisedim me institucionet përkatese./ Boldnews.al
