Disa javë pas arrestimit të Rozeta Dobit, një tjetër pastruese është arrestuar nga policia e Tiranës, nën akuzën se ka vjedhur në banesën ku punonte.
Këtë të Shtunë, policia e Tiranës njoftoi vënien në pranga të Elida Kodrës, e cila akuzohet se ka vjedhur një shumë parash në një banesë ku punonte si pastruese.
Asaj i janë sekuestruar 840 euro, 600 dollarë dhe 40 900 lekë (të rinj).
Banesa ku ajo akuzohet se ka vjedhur ndodhet në rrugën “Vaso Pasha’”, në zonën e “ish-Bllokut”, në pronësi të një personi që policia e identifikon në një njoftim zyrtar me iniciale Z.E.. Ky i fundit ka denoncuar se i kanë vjedhur më shumë se 2500 euro.
Hetimet
“Shërbimet e Komisariatit të Policisë Nr. 2, bazuar dhe në provat e siguruara gjatë një pune hetimore për vjedhjen e disa shumave parash, në një banesë në rrugën ‘Vaso Pasha’, kanë organizuar dhe finalizuar operacionin policor të koduar “Gracka”. Si rezultat i këtij operacioni u bë ndalimi i shtetases Elida Kodra, banuese në Tiranë”, njoftoi policia.
Nga provat e siguruara gjatë hetimit, sipas të njëjtave burime, ka rezultuar se Kodra, e cila ka qenë e punësuar për mirëmbajtjen e banesës së shtetasit Z.E., në rrugën “Vaso Pasha”, gjatë javës së fundit ka vjedhur në këtë banesë, 2000 euro, 300 dollarë dhe 35 000 lekë të rinj.
“Gjatë kontrollit të çantës së Kodrës, efektivët e Policisë gjetën dhe sekuestruan në cilësinë e provës materiale, 840 euro, 600 dollarë dhe 40 900 lekë të rinj”, thuhet më tej në njoftimin e bluve.
Lexo edhe:
“Rozeta 2”, rrengu që çoi në pranga pastruesen në Tiranë (Detajet)
