Prej disa ditësh vijon aksioni i policisë për të çmontuars kamerat “spiune” të vendosura nga grupet kriminale për të pasur kontroll të plotë mbi çdo cep të territorit të Shqipërisë.
Gjatë 24 orëve të fundit, uniformat blu në disa qarqe të vendit kanë çmontuar dhe sekuestruar dhjetëra kamera sigurie që ishin vendosur në kundërshtim me ligjin.
Në Korçë janë hequr 6 kamera, në Vlorë 10 dhe në Durrës 7, ndërkaq kanë nisur hetimet për 13 persona, për ndërhyrje të padrejta në jetën private.
Policia e Shtetit njofton se:
-Në qarkun Korçë, në vijim të fazës së pestë, Policia ka çmontuar dhe sekuestruar 6 kamera të vendosura në kundërshtim me ligjin. Në hetim për ndërhyrje të padrejta në jetën private, 6 shtetas. Deri tani, në këtë qark, janë çmontuar dhe sekuestruar në total 54 kamera dhe janë iniciuar hetime të thelluara për 20 shtetas.
-Në qarkun Vlorë, në vijim të fazës së tretë, Policia ka sekuestruar 10 kamera të vendosura në kundërshtim me ligjin, në Vlorë dhe në Delvinë. Në hetim për ndërhyrje të padrejta në jetën private, 4 shtetas. Deri tani, në këtë qark, janë çmontuar në total 26 kamera.
-Në qarkun Durrës, në vijim të fazës së katërt, Policia ka sekuestruar 7 kamera të vendosura në kundërshtim me ligjin. Në hetim për ndërhyrje të padrejta në jetën private, 3 shtetas.
Kujtojmë që para 2 ditësh ministri i Brendshëm Blendi Çuçi e justifikoi dështimin e policisë duke deklaruar se “krimi i organizuar” ishte kamufluar si biznes për të montuar kamera jo vetëm në objekte të caktuara por edhe shtyllat elektrike, semaforët apo ndriçuesit e rrugëve që prej kohësh ishin kthyer në funksionon të bandave kriminale.
