Rusja Svetlana Timofeeva, e cila u arrestua tre muaj më parë pas sulmit në uzinën e Gramshit, pasi akuzohet për akte më qëllim spiunazhin, do të vijojë të mbetet në paraburgim në Shqipëri.
Kjo pasi, seanca e parashikuar për t’u zhvilluar ditën e sotme në Gjykatën e Elbasanit e që do të shqyrtonte kërkesën e autoriteteve në Moskë për ekstradimin e saj, është shtyrë.
Një vendim për ekstradimin e 33-vjeçares ruse mbetet kështu ende pezull dhe shkak është bërë mungesa e prokurorit të çështjes, Mustafa Turku, i cili thuhet se ka probleme shëndetësore.
Timofeeva aktualisht është e paraburgosur nën masën e sigurimit “Arrest në burg”, e arrestuar për spiunazh në Shqipëri para tre muajsh, ndërsa Rusia ka kërkuar ekstradimin e saj.
Nga aktet e përcjella nga autoritete ruse të drejtësisë rezulton se Timofeeva, është person i shpallur në kërkim në Rusi për veprën penale të “Marrje e paligjshme e informacionit që përbën sekret shtetëror”, por 33-vjeçarja e ka refuzuar ekstradimin me argumentin se i rrezikohet jeta në vendin e saj.
