Një vajzë katër vjeçare ka vdekur mbrëmjen e së martës pas një sulmi fatal nga një qen.
Ngjarja ka ndodhur në Broadlands të Britanisë së Madhe, ku oficerët u thirrën nga shërbimi i ambulancës pak pas orës 17:00 pas një raportimi se një qen kishte sulmuar një fëmijë në kopshtin e pasmë të një banese.
Menjëherë u konfirmua se fëmija kishte vdekur. Incidenti është duke u hetuar nga policia e “Thames Valley” në Milton Keynes, ndërsa qeni është ekzekutuar menjëherë pas sulmit.
Askush tjetër nuk u lëndua si rezultat i incidentit dhe familja e fëmijës po mbështetet nga oficerë të trajnuar posaçërisht për incidente të tilla.
“Ky është një incident absolutisht tragjik, në të cilin ne besojmë se një fëmijë është vrarë pasi është sulmuar nga një qen. Është e qartë se ne jemi në faza shumë të hershme të një hetimi dhe do të ishte e gabuar dhe e padobishme të spekulosh për rrethanat e sakta të këtij incidenti në këtë pikë. Megjithatë, për të garantuar sigurinë publike, në fillim të mbrëmjes është marrë një vendim për të ekzekutuar qenin e përfshirë, dhe kjo është bërë në mënyrë njerëzore. Unë e kuptoj se sa ndikim do të ketë kjo në komunitet dhe në publikun e gjerë, dhe njerëzit mund të presin të shohin një prani të madhe policie në zonë këtë mbrëmje dhe më tej, ndërsa hetimi ynë vazhdon”, tha një nga drejtuesit e policisë që pa skenën.
