Emisioni “Stop” ishte në fshatin Allprenaj të Lushnjes për problemin e zonjës Shegushe Malo, e cila prej një viti nuk ngrihet nga krevati pas trombozës, që i ka paralizuar krahun dhe këmbën e majtë. Bashkëshorti i saj, Ismet Malo, tha se ka çuar letrat për Kemp në Tiranë, por nuk ka përgjigje. Ndërkohë Shegushja ka nevojë për një person, që të kujdeset për të dhe paketa higjienike.
“Ndoqëm të gjitha veprimet, ajo është e pavetëdijshme. Këmba e majtë dhe krahu i majtë i saj nuk funksionon fare dhe kemi hasur vështirësi. I kemi bërë ato veprimet ato e pyesin online, ajo reagoi jam mirë të keqen nëna se nuk është e vetëdijshme. Çdo gjë ajo nuk e bën vetë. Nuk kanë nxjerrë Kemp. Tani unë kam hyrë në borxh, është turp ta themi këtë, 2 milionë e 800 mijë lekë borxh. Si do i laj unë këto. Kam hyrë se kjo do shërbimet, do bebelina, do ilaçe. Prandaj them që shita lopën që të mbyllja ndonjë vrimë të kësaj pune. Nuk mbylla asnjë vrimë. Mirë që kam ndonjë shok se nëpër banka kërkon më shumë hesape. Kam pyetur nëpër shokë nëpër miq, ku do i laj unë i shkreti, unë 100 mijë lekë marr në muaj. Kjo merr 85 mijë. Nuk na del hesapi”, tha ai.
“Stop” iu drejtua Administratorit Social në Njësinë Administrative Golem, Lushnje, i cili tha, se nuk ka mbërritur përgjigje nga Tirana.
Administratori: Dosja ka qenë në Kempin Epror, ka shkuar në Kempin Epror dhe tani nuk e dimë përgjigjen e Kempit Epror, sepse akoma nuk e kam në zyrë fizikisht si dosje.
Gazetarja: Pra kur thoni Kempin Epror e keni fjalën për Shërbimin Social në Tiranë.
Administratori: Po Shërbimin Social Shtetëror, patjetër!
Ndërkohë gazetarja iu drejtua Shërbimit Social ku shpjeguan, se zonja nuk e përfiton Kempin, pasi nuk përfshihet në statusin e para dhe tetraplegjikut.
“Jo çdo lloj paralize mund të përfitojë status të paratetraplegjisë dhe konkretisht është rasti i zonjës Malo që skualifikohet”, thuhet në reagimin e Shërbimit Social.
Në këtë mënyrë kjo familje duhet të jetojë me 80 mijë lekë të vjetra në muaj.
