Tallja e madhe e Bordit të Transparencës që Edi Rama dhe Belinda Balluku krijuan me justifikimin për të mbrojtur qytetarët nga abuzimet ka vijuar sërish sot, teksa ky organ njofton vendimin e ri për ndryshimin e çmimit të karburanteve.
Bordi komunist në ditën që Gjykata Kushtetuese do të marrë në shqyrtim kërkesën e Partisë Demokratike për shkrirjen e tyre, ka vendosur që të bëjë një ulje qesharake të çmimeve.
Kështu sipas vendimit të ri që nis të zbatohet nga ora 18:00, një litër naftë në vend do të shitet me 6 lekë më pak sesa shitej në pompat e karburanteve prej 26 janarit.
Një litër naftë të tregtohet me 200 lekë/litër, ndërsa edhe më tallës është vendimi për të ulur me 1 lekë çmimin e benzinës, që do të shitet me 190 lekë/litër.
I pandryshuar mbetet sakaq çmimi i gazit në 69 lekë/litri.
Këto ndryshime të çmimeve nga Bordi i Ramës vijnë në kohën kur prej më shumë se një muaji çmimi i naftës në bursën ndërkombëtare është në “pikiatë” dhe operatorët e tregut pohojnë se nëse Bordi nuk do të ndërhynte, çmimet do të ishin të paktën 5% më lire.
Njoftimi i BT:
Referuar të dhënave lidhur me bursën Platts të datës 30.01.2023, kemi ndryshime të çmimit nga ai përcaktuar në mbledhjen e fundit, konkretisht rezulton se çmimi (FOB/MED $ Ton) i Benzinës është 866, -13 nga data 25.01.2023, $/ Ton, ndërsa çmimi i Gazoilit/Diesel është 891, -56 nga data 25.01.2023, $/Ton. Kursi i këmbimit i BSH ka pësuar ulje të lehtë në 107.27 (-0.24 nga data 25.01.2023).
Si rrjedhojë çmimet e vendosura janë:
Çmimi i shitjes me pakicë i nënproduktit gasoil i standardit SSH EN 590 të jetë jo më shumë se 200 lekë/litri, ndërsa i shitjes me shumicë jo më shumë se 188 lekë/litër.
Çmimi i shitjes me pakicë i nënproduktit benzinë e standardit SSH EN të jetë jo më shumë se 190 lekë/litri, ndërsa i shitjes me shumicë jo më shumë se 178 lekë/litër.
Çmimi i shitjes me pakicë i nënproduktit gaz, të jetë 69 lekë/litri me pakicë dhe i shitjes me shumicë 57 lekë/litër për automjetet.
Çmimi i gazoilit për peshkim është vendosur 106 lekë/litër.
Çmimet e caktuara nga Bordi do të hynë në fuqi në datë 31 Janar, ora 18.00, dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.
Bordi i transparencës që në krijimin e tij i është përmbajtur me përpikmëri në vendimet e tij lëvizjes së bursës Platts të Mesdheut për gazoilin, benzinën, si dhe faturave zyrtare të operatorëve.
Ministria e Financave dhe Ekonomisë ndjen detyrimin të sqarojë opinionin publik se jo çdo lëvizje e bursës së naftës bruto reflektohet në të njëjtën kohë dhe në të njëjtën masë në bursën e gazoilit dhe benzinës.
