Partia Socialiste duket se ka gjetur një zgjidhje për t’i bërë ballë akuzave të opozitës në Kuvend dhe qëndrimit të palëkundur të kreut të PD, Sali Berisha në momentin që bllokon foltoren për t’i renditur “të palarat” kryeministrit Edi Rama.
Në mbledhjen e grupit të mazhorancës që është zhvilluar mëngjesin e kësaj të hëne, Taulant Balla u ka komunikuar deputetëve direktivat e Ramës, duke kërkuar që në rast bllokimi të foltores ose kaosit të veprojnë si në seancën e kaluar.
Socialistët pritet kështu të votojnë rendin e ditës pavarësisht qëndrimit bllokues të opozitës dhe më pas do kalojnë në votimet e tjera.
“Në seancë plenare, në rast bllokimi nga PD, do të përsëritet i njëjti qëndrim i PS. Do të votojnë rendin e ditës pavarësisht qëndrimit bllokues të opozitës”, mësohet të jetë shprehur Balla.
Ndërkohe, në një prononcim për mediat kreu i Grupit të PS tha se “situata që është krijuar është një situatë qesharake”, duke u ndaluar kështu te seanca e 16 janarit.
“Sa herë hapet një sesion, çohet një person bllokohen foltoren. Ndaj ju them që kjo është një situatë shumë qesharake megjithatë ajo që ka rëndësi është se kush mendon dhe pretendon se mund të marrë peng Kuvendin, e ka gabim. Kuvendi vijon punimet. Në këtë rast është miratimi i çështjeve që ka në rendit të ditës. Në kushtet e një deklarimi që një pjesë e opozitës është zotuar se në Kuvend nuk do ketë punime normale, kuvendit duhet të veprojë. Duhet t’ia bëj shumë të qartë që as njëlloj kërkese e kësaj forme nuk mund miratohet dhe nuk vlen të merret në konsideratë”, u shpreh Balla.
Sakaq, mësohet se Rama ka kërkuar nga të vetët që në Kuvend të “heshtin” për skandalin e pagesave dhe korruptimin e ish-zyrtarit të FBI-së, Charles Mc Gonigal, duke mos ndryshuar qëndrimin e mbajtur gjatë javës që lamë pas.
Kujtojmë se në seancën e kaluar, kryeministri Rama iu shamng përgjegjësisë duke iu fshehur llogaridhënies në Kuvend për aferën McGonigal, pasi mungoi në seancë, ndërkohë që opozita kishte kërkuar ndryshim të rendit të ditës për të lejuar debatin mbi skandalin në fjalë.
