Çështja McGonigal që ka tronditur pushtetin e Edi Ramës në Shqipëri dhe po mundohet të sfumohet nga përfaqësuesit e mazhorancës në çdo dalje publike për të zbehur rolin e kryeministrit në korruptimin e një zyrtari të FBI-së, në SHBA është pjesë e një hetimi të trajtuar me shumë seriozitet.
Këtë e tregon më së miri vëmendja që po i kushton media, por edhe politikanët e të dy krahëve në Uashington, fshehjes së takimeve që McGonigal ka zhvilluar me kryeministrin Rama dhe fluturimet me ish-agjentin e SHIK Agron Nezaj në Tiranë, pas pagesës 225 mijë dollarë.
Së fundmi ka qenë kongresmeni republikan Jim Jordan që ka reaguar për rastin në fjalë duke thënë se FBI është përdorur si armë politike.
Jordan, i cili njihet si një mbështetës i fortë i Trumpit iu referua “armatizimit” të agjencisë federale, duke kritikuar FBI-në dhe përmendur Charles McGonigal, agjentin special të ngarkuar me divizionin e kundërzbulimit të FBI-së në Nju Jork nga viti 2016 deri në 2018.
“FBI ka spiunuar fushatën e presidentit, ka ndryshuar provat përpara gjykatës FISA, ka paguar një burim njerëzor konfidencial edhe pse e dinin se burimi njerëzor konfidencial i kishte gënjyer”, ka deklaruar ai.
WATCH: Rep. Jim Jordan (R-Ohio) describes the “weaponization” of gov. agencies, including the FBI.@chucktodd: “Are you going to look at the role Paul Manafort played with Oleg Deripaska?”@Jim_Jordan: “To the extent that may come in.” pic.twitter.com/tjD64ca95k
— Meet the Press (@MeetThePress) January 29, 2023
McGonigal u akuzua të hënën e kaluar se punonte me Oleg Deripaskën, ndërsa në aktakuzë përmendet edhe kryeministri shqiptar Edi Rama, për disa takime të padeklaruara me zyrtarin e FBI.
Departamenti i Drejtësisë (DOJ) tha se McGonigal, i cili mori pjesë në hetimin e oligarkëve rusë, mori para nga Deripaska në 2021 për të hetuar një tjetër oligark. Agjenti special ka punuar gjithashtu në vitin 2019 për të hequr sanksionet e vendosura ndaj Deripaska, sipas AP.
Së fundmi, Dhoma e Përfaqësuesve ka krijuar një komitet të posaçëm, që do të hetojë përdorimin e agjencive federale si armë kundër të djathtëve. Ky komitet që drejtohet pikërisht nga Jim Jordan do të ketë autoritet të gjerë për të hetuar Departamentin e Drejtësisë, agjencitë e inteligjencës si FBI dhe CIA, por edhe kompani private si Twitter.
Komiteti do ketë një buxhet të jashtëzakonshëm dhe do të hetojë akuzat se këto agjenci kanë dhunuar të drejtat civile, ndërsa do përbëhet nga 12 republikanë dhe 9 demokratë.
