Vetëm 5 minuta ka zgjatur dhuna agresive që pesë efektivët e policisë në Memphis të SHBA-së ushtruan mbi 29-vjeçarin me ngjyrë Tire Nichols, duke e lënë të vdekur në vend.
Në videot e reja të publikuara nga mediat ndërkombëtare, 29-vjeçari fillimisht neutralizohet me një teaser elektrik dhe më pas tërhiqet zvarrë dhe goditet me grushte e shkelma.
Skenat e dhunës janë tepër të rënda dhe shpjegojnë qartë pse 29-vjeçari ka ndërruar jetë menjëherë.
Ato tregojnë ndalimin e tij nga policia, tentativën për të shpëtuar, më pas rrahjen e egër kur e kapën sërish dhe mungesën e kujdesit mjekësor për të, duke e lënë të dergjet në asfalt.
Pesë oficerë të përfshirë në incidentin e 7 janarit janë akuzuar për vrasje të shkallës së dytë dhe janë shkarkuar nga detyra.
CJ Davis, shefi i respektuar i policisë në Memphis, tha se ajo kurrë nuk kishte parë ndonjë gjë kaq shkatërruese në karrierën e saj policore.
Ndërkohë Benjamin Crump, një avokat që përfaqëson familjen Nichols, tha se djali u trajtua si një “pinjata” njerëzore.
Sakaq, katër klipet – tre nga kamerat e trupit, një nga një kamera e vëzhgimit e bashkangjitur në një postim kanë tronditur dhe zemëruar Amerikën mbarë duke ndezur revolta.
