Pas qytetit të Shkodrës, Policia ka ndërmarrë aksione dhe në Korçë dhe Pogradec për heqjen e kamerave “spiune” të vendosura në ambiente publike nga të “fortët”.
Gjatë aksionit janë hequr 31 kamera, ndërsa nuk dihen ende poseduesit e tyre. Autoritetet thotë se përgjegjësit do të vihen shumë shpejt para drejtësisë.
“Në bazë të urdhrit nga drejtoria e përgjithshme e policisë për kontrollet e kamerave, të cilat janë vendosur në mënyrë të jashtëligjshme, edhe drejtoria vendore e policisë së Korçës është duke identifikuar rastet e shkeljes
Deri në këto momente janë hequr 31 kamera në qytetin e Korçës dhe atë të Pogradecit, ku shkelësit e ligjit do të ndiqen dhe penalisht.”- njoftoi policia.
Kontrollet do të vijojnë edhe në qytetet e tjera të juglindjes dhe nëpër fshatra.
Kujtojmë se në Shkodër janë hequr deri tani mbi 60 kamera, por nuk dihet ende se kush janë autorët, të cilët i kanë vendosur këto mjete survejimi. Policia ka nisur ekzaminimet e tyre dhe për këtë janë shoqëruar disa persona.
