Është zbardhur dinamika e aksidentit në Elbasan, më datë 23 të këtij muaji, ku mbeti i vdekur një 20-vjeçar.
Blutë bëjnë me dije se është vënë në pranga autori i ngjarjes, i cili pasi përplasi 20-vjeçarin është larguar nga vendi i ngjarjes.
Në pranga ka rënë shtetasi A.D, 65-vjeç.
“Si rezultat, nga shërbimet e Policisë u bë identifikimi, lokalizimi dhe ndalimi i drejtuesit të automjetit, shtetasit A. D., 65 vjeç, banues Fier, për veprat penale “Shkelja e rregullave të qarkullimit rrugor” dhe “Largimi nga vendi i aksidentit”.
Nga veprimet hetimore rezultoi se ky shtetas, mbrëmjen e datës 23.01.2023, në unazën e qytetit, duke drejtuar automjetin tip “Benz”, ka aksidentuar me pasojë vdekjen, shtetasin F. S., 20 vjeç, banues në Elbasan, i cili po lëvizte me këmbë. Pas aksidentit, drejtuesi i automjetit është larguar menjëherë nga vendi i ngjarjes”,– thuhet në njoftimin e policisë.
Materialet i kaluan Prokurorisë pranë Gjykatës së Shkallës së Parë Elbasan, për veprime të mëtejshme.
