Çështja “McGanigal” ka marrë përmasa serioze edhe për drejtësinë shqiptare, teksa në SPAK kanë mbërritur kërkesa për ta marrë nën hetim kryeministrin Edi Rama dhe shkresa me aktakuzën përkatëse.
Ka qenë deputeti i Partisë Demokratike, Ervin Salianji që i ka dërguar sot Prokurorisë së Posaçme shkresa me aktakuzën dhe lajmet e mediave ndërkombëtare për arrestimin e ish-zyrtarit të FBI-së Charles McGonigal.
Në mungesë të një reagimi nga institucionet shtetërore, një shkresë e ngjashme sipas Salianjit i është dërguar edhe SHISH e Ministrisë së Brendshme, duke kërkuar hetimin e lidhjeve të zyrtarit amerikan me “mikun” nga Tirana, Edi Rama.
“Të gjitha mediat ndërkombëtare e kanë pasur në faqe të parë dhe lajm të parë Shqipërinë, si një vend i cili ka tentuar të korruptojë në këtë rast. Unë s’mund të bëj dot as prokurorin, as akuzatorin, por moralisht mendoj se nuk ka asnjë çështje më të rëndësishme. Nuk ka asnjë reagim nga institucionet shtetërore. Në përmbushje të detyrës i kam çuar shkresë SPAK, SHISH si dhe Ministrisë së Brendshme bashkë me dy institucionet që ka në varësi. Ky zyrtar ka mbuluar dhe Shqipërinë. Mediat prestigjioze që kanë i kam çuar në letër, pritet të dalë të shtunën për të pranuar ose jo akuzat që rëndojnë mbi të. Ai dyshohet se ka marrë 280 mijë dollarë. Akt padia e bërë publike nga autoritetet amerikane nuk kanë publikuar dy personat që akuzohet për të A dhe B. Por mediat kanë zbuluar se kush janë këta dy persona, të cilët janë miq me njëri-tjetrin”, tha Salianji.
