Shqipëria është shndërruar në një “mini-Palermo”, teksa njëjtë si mafia siçiliane edhe organizatat kriminale në vend kontrollojnë qytetet ku kanë bazat e tyre me kamera të vendosura në rrugët kryesore dhe ato hyrëse e dalëse.
Pas Shkodrës dhe Vlorës ku u çmontuan në tre faza 75 kamera që në ditën për diell dhe pa u fshehur aspak nga Policia e Shtetit, monitoronin prej kohësh lagjet më strategjike, edhe në qarkun e Durrësit historia është e njëjtë.
Në fazën e katërt të operacionit “Fijet” policia ka çmontuar 47 kamera të vendosura në Durrës, Shijak dhe Krujë, ku fshati Nikël duket se ka qenë një nga pikat më të nxehta.
Gjatë aksionit në Durrës u vunë nën hetim për ndërhyrje të padrejta në jetën private 8 persona (nga këta, 2 shtetas në Durrës dhe 6 shtetas në Shijak) të cilët i kishin montuar kamerat në mënyrë të kundërligjshme.
Mësohet se të vendosur nën hetim në Durrës janë Plarent Dervishi dhe Dejvid Karaboja, ndërsa në Shijak bëhet fjalë për Albert Muharremin, vëllai i të njohur si “Rrumi i Shijakut”, Xhulio Vora, Astrit Balliu (Avdyli), Jasin Kala (Avduli ), Altin Avdyli dhe Sajmir Gjepali.
Sakaq, edhe në Korçë e Pogradec janë hequr kamerat “spiune” të vendosura në ambiente publike nga të “fortët”. Gjatë aksionit në dy qytetet e Juglindjes janë hequr 31 kamera, ndërsa nuk dihen ende peronat që i kishin montuar.
Njoftimi i policisë:
Strukturat hetimore të DVP Durrës, në bashkëpunim me komisariatet e Policisë Durrës, Shijak dhe Krujë, në zbatim të detyrave të përcaktuara në kuadër të planit operacional mbarëkombëtar të koduar “Fijet”, i iniciuar nga Drejtoria e Përgjithshme e Policisë së Shtetit, si dhe me mbështetjen e inteligjencës informative, për vendosjen e paautorizuar të disa kamerave, në disa lagje të qyteteve në qarkun e Durrësit, me qëllim sigurimin e informacioneve, për qëllime kriminale, si dhe për të monitoruar lëvizjet e Policisë, kanë organizuar punën për evidentimin dhe çmontimin e këtyre kamerave, identifikimin e pronarëve të tyre, si dhe për dokumentimin e plotë ligjor të qëllimit të përdorimit.
-Gjatë fazës së katërt të këtij plani operacional, në Durrës, në lagjet nr. 6 dhe nr. 17, janë çmontuar 11 kamera, si dhe janë në hetim, shtetasit D.K. dhe P.D. (aktualisht i shpallur në kërkim për një vepër tjetër penale).
-Plani operacional ka vijuar në Shijak dhe nga kontrolli i ushtruar në qendrat urbane të kësaj bashkie, bazuar në planin e masave të iniciuar nga Drejtoria e Përgjithshme e Policisë së Shtetit, u çmontuan dhe u sekuestruan 18 kamera të vendosura në lagjen e “Keçeve” dhe në lagjet “Popullore”, “Kodër Sukth” dhe “Partizani”.
Në vijim të veprimeve procedurale për këto raste, janë në hetim shtetasit J. K., A. B., A. A., Xh. V., A. M. dhe S. Gj.
-Gjithashtu, plani operacional “Fijet”, ka vijuar në Krujë dhe në Nikël, ku janë çmontuar dhe sekuestruar 18 kamera të tjera, të vendosura në shtyllat elektrike të disa lagjeve të qytetit të Krujës dhe në Nikël. Vijon intensivisht puna hetimore, për identifikimin dhe procedimin penal, të shtetasve që kanë vendosur në mënyrë të kundërligjshme, këto kamera.
Në bashkëpunim me prokuroritë pranë gjykatave të rretheve gjyqësore Durrës dhe Krujë, vijon puna intensive për zbardhjen e plotë të qëllimit të vendosjes së kamerave në Nikël dhe në Krujë, si dhe për identifikimin dhe procedimin penal të shtetasve që i kanë vendosur këto kamera.
Vijojnë hetimet e thelluara, për të identifikuar dhe proceduar shtetasit që kanë vendosur kamera në Nikël dhe në Krujë, si dhe për të zbardhur qëllimin e vërtetë të vendosjes së tyre.
